بايقوڭىردا پروكۋراتۋرا اۋداندىق اۋرۋحاناداعى بۇزۋشىلىقتاردى انىقتادى، سونىڭ سالدارىنان جۇزدەگەن ايەل مەن نارەستە تيەسىلى «انا جانە بالا» جيىنتىقتارىن الا المادى. قاداعالاۋ ورگانىنىڭ ارالاسۋىنان كەيىن 600 انا مەن بالا تەگىن مەديسينالىق كومەكتىڭ كەپىلدىك كولەمى اياسىندا قاجەتتى جيىنتىقتارمەن قامتاماسىز ەتىلدى، دەپ حابارلايدى infohub.kz سايتى.
قىزىلوردا وبلىسى پروكۋراتۋراسىنىڭ مالىمەتىنشە، بۇزۋشىلىقتار دەنساۋلىق ساقتاۋ سالاسىنداعى زاڭنامانىڭ ساقتالۋىن تالداۋ بارىسىندا انىقتالعان. ايەلدەر جۇكتىلىك كەزىندە جەرگىلىكتى مەديسينالىق ۇيىمداردا باقىلاۋدا بولعان، الايدا بالا تۋىلعاننان كەيىن ولارعا قاراستىرىلعان جيىنتىقتار بەرىلمەگەن.
«تەگىن مەديسينالىق كومەكتىڭ كەپىلدىك كولەمى اياسىندا نارەستەلەردى „انا جانە بالا“ جيىنتىقتارىمەن تولىق قامتاماسىز ەتۋ تالاپتارىنىڭ ساقتالماۋ فاكتىلەرى انىقتالدى. بايقوڭىر قالاسىنىڭ تۇرعىندارى جۇكتىلىك كەزەڭىندە جەرگىلىكتى مەديسينالىق ۇيىمداردىڭ باقىلاۋىندا بولادى. دەگەنمەن، بالا تۋىلعاننان كەيىن زاڭنامادا كوزدەلگەن دارى-دارمەك جيىنتىقتارى انالارعا بەرىلمەگەن»، — دەپ حابارلادى پروكۋراتۋرادا.
پروكۋراتۋرا ارالاسقاننان كەيىن بۇزۋشىلىقتار جويىلدى. «پروكۋراتۋرالىق قاداعالاۋ اكتىسىنىڭ ناتيجەلەرى بويىنشا شارالار قابىلدانىپ، بۇزىلعان قۇقىقتار قالپىنا كەلتىرىلدى، 600 انا مەن بالا قاجەتتى „انا جانە بالا“ جيىنتىقتارىمەن قامتاماسىز ەتىلدى»، — دەپ اتاپ ءوتتى ۆەدومستۆودا.
پروكۋراتۋرا انىقتالعان بۇزۋشىلىقتار ازاماتتاردىڭ، ونىڭ ىشىندە نارەستەلەردىڭ كونستيتۋسيالىق قۇقىقتارىنا اسەر ەتكەنىن اتاپ ءوتتى.