قازاقستان باس پروكۋراتۋراسى ازاماتتارعا سيم-بوكستاردىڭ زاڭسىز اينالىمى تۋرالى ەسكەرتۋ جاسادى. مۇنداي ارەكەتتەر بەس جىلعا دەيىن باس بوستاندىعىنان ايىرۋعا اكەپ سوعۋى مۇمكىن، دەپ حابارلايدى infohub.kz سايتى.
قاداعالاۋ ورگانىنىڭ رەسمي Telegram-ارناسىندا اتاپ وتىلگەندەي، ءدال ءبىر جىل بۇرىن، 2025 جىلعى 30 تامىزدا، رەسپۋبليكادا بۇل قۇرىلعىلاردى زاڭسىز پايدالانۋعا زاڭنامالىق تىيىم سالىنعان ەدى. «بايلانىس تۋرالى» زاڭنىڭ 4-بابىنىڭ 4-تارماعىنا سايكەس، GSM-شليۋزدەردى اكەلۋ، تىركەۋ، ساتۋ جانە قولدانۋ ءتيىستى ليسەنزياسى بار بايلانىس وپەراتورلارىنا عانا رۇقسات ەتىلەدى.
وسىعان قاراماستان، كەيبىر ادامدار مۇنداي جابدىقتى ليسەنزياسىز زاڭسىز اكەلۋدى، ساتۋدى جانە پايدالانۋدى جالعاستىرۋدا. ولاردىڭ قاتارىندا ينتەرنەت-الاڭداردا حابارلاندىرۋلار ورنالاستىراتىن جەكە ساتۋشىلار، سونداي-اق تەلەكوممۋنيكاسيالىق تەحنيكا ساتاتىن دۇكەندەر دە بار، دەپ اتاپ ءوتتى ۆەدومستۆودا.
مىسال رەتىندە باس پروكۋراتۋرا سولتۇستىك قازاقستان وبلىسىنداعى وقيعانى كەلتىردى. وندا ينتەرنەتتە 120 مىڭ تەڭگەگە ءتورت سلوتتى GSMء-شليۋزدى ساتۋ تۋرالى حابارلاندىرۋ ورنالاستىرعان ازاماتقا قاتىستى اكىمشىلىك حاتتاما جاسالعان. ءقازىر ونى اكىمشىلىك جاۋاپكەرشىلىككە تارتۋ ماسەلەسى شەشىلۋدە.
قاداعالاۋ ورگانىندا سيم-بوكستار حالىقارالىق تەلەفون ترافيگىن قازاقستاندىق SIM-كارتالار ارقىلى وتكىزۋگە مۇمكىندىك بەرەتىنىن ءتۇسىندىردى. بۇل الاياقتارعا شەتەلدەن جەرگىلىكتى نومىرلەردىڭ اتىنان قوڭىراۋ شالۋعا، قوڭىراۋدىڭ ناقتى كوزىن جاسىرۋعا مۇمكىندىك بەرەدى. مۇنداي جابدىقتىڭ قىلمىسكەرلەردىڭ قولىنا ءتۇسۋى جاپپاي الاياقتىق قوڭىراۋلار مەن اقشا ۇرلاۋعا جاعداي جاسايدى.
«وسىعان بايلانىستى بەلگىلەنگەن ءتارتىپتى بۇزا وتىرىپ، سيم-بوكستاردى ساتىپ الماڭىزدار جانە پايدالانباڭىزدار»، — دەپ ۇندەدى باس پروكۋراتۋرا. تىيىم سالىنعانعا دەيىن ساتىپ الىنعان GSM-شليۋزدەردىڭ يەلەرىنە قۇرىلعىلاردى ودان ءارى پايدالانۋ ماسەلەسىن شەشۋ ءۇشىن ۋاكىلەتتى ورگانعا جۇگىنۋ ۇسىنىلدى. «ءتيىستى تۇسىنىكتەمەلەر العانعا دەيىن سيم-بوكستاردى پايدالانۋعا بولمايدى. بۇل ءۇشىن 5 جىلعا دەيىن باس بوستاندىعىنان ايىرۋ قاراستىرىلعان»، — دەپ قوستى ۆەدومستۆو.