لوس-اندجەلەس جوعارعى سوتىنا بەرىلگەن تالاپ-ارىزدا قاراپايىم وتباسى ءانشى D4vd ەسىمىمەن تانىمال بەرككە قارسى ايىپتاۋلاردى قايتالايدى. اقش-تىڭ بىرنەشە باق-ى حابارلاعانداي، مەرسەدەس مارتينەس پەن حەسۋس ريۆاس بەركتىڭ قىزدارىنىڭ قازاسىنا كىنالى ەكەنىن، ونى زاڭسىز ۇستاعانىن جانە جىنىستىق زورلىق-زومبىلىق جاساعانىن العا تارتادى.
سوت قۇجاتتارىنا سايكەس، بەرك پەن ەميليا ريۆاس ەرناندەس العاش رەت 2023 جىلدىڭ قاراشا ايىندا، قىز 13 جاستا بولعاندا تانىسقان. كەيىنگى 16 اي ىشىندە ولار 10 000-عا جۋىق حات الماسىپ، بىرنەشە رەت جىنىستىق قاتىناسقا تۇسكەن. اتا-اناسىنىڭ وتىنىشىندە: «بەرك بارلىق ۋاقىتتا كامەلەتكە تولماعان قىزعا قاتىستى بيلىك ورنىن يەلەنگەن ەرەسەك ادام بولدى جانە وعان زاڭسىز ىقپال ەتىپ، باقىلاۋ جاساي الدى»، — دەلىنگەن.
اتا-انالار بەرك قىزدى گولليۆۋد-حيللزدەگى ۇيىندە، ولاردىڭ قارىم-قاتىناسىن جاريالايمىن دەپ قورقىتقاندا ولتىرگەن دەپ مالىمدەيدى. قىزدىڭ سوڭعى حاتىندا: «مەن سەنىڭ مانسابىڭدى دا، ءومىرىڭدى دە قۇرتامىن»، — دەپ جازىلعان. تالاپ-ارىزدا بەركتەن بولەك، ونىڭ بىرنەشە كومپانياسى، مەنەدجەرلەرى، اناسى جانە تۇراقتى كۇزەتشىسى دە اتالعان. ەرناندەستىڭ اتا-اناسى بۇل ادامدار بەرككە قىزدى وقشاۋلاۋعا كومەكتەسىپ، ونىڭ ساپارلارىن، تۇرعىن ءۇيىن جانە قاۋىپسىزدىگىن قامتاماسىز ەتكەن دەپ سانايدى.
شىلدە ايىندا سۋديا بەركتىڭ كىسى ءولتىرۋ ايىبى بويىنشا سوتقا تارتىلۋىنا جەتكىلىكتى نەگىز بار دەپ تاپتى. وكرۋگ پروكۋرورى ءولىم جازاسىن قولدانۋ ماسەلەسىن قاراستىرىپ جاتقانىن ايتتى. دۇيسەنبىدە، ەرناندەستىڭ 16 جاسقا تولار كۇنى، ونىڭ وتباسى بەرككە ءولىم جازاسىن قولدانۋدى تالاپ ەتتى. وتباسى ادۆوكاتى ارقىلى تاراتقان مالىمدەمەدە: «ەگەر ءولىم جازاسى قولدانىلسا، بۇل جۇرەگى تاس، ار-ۇجدانى جوق، قىزىمىز بەن وتباسىمىزعا، ءبىزدىڭ قىمباتتى قىزىمىزدى قولدايتىن بۇكىل الەمگە تەك قاسىرەت اكەلگەن ادام ءۇشىن ەڭ دۇرىس شەشىم بولار ەدى»، — دەلىنگەن.
بەرك وتكەن اپتادا تاعى دا كىناسىن مويىندامادى جانە اتاقتى ادۆوكاتىنان باس تارتتى. ءقازىر ونى قوعامدىق قورعاۋشى قورعايدى. كەلەسى سوت وتىرىسى 19 قازاندا وتەدى، ال ءىس كەلەسى جىلعا شەگەرىلدى. قوعامدىق قورعاۋشىنىڭ ورىنباسارى ۋاليد كانديل بەركتىڭ «ىس-ارەكەتىن بايىپپەن قاراستىراتىن جانە دالەلدەردى مۇقيات تەكسەرەتىن قورعاۋعا قۇقىعى بار» ەكەنىن ايتتى. ول: «ءبىز وعان وسىنداي قورعاۋدى قامتاماسىز ەتۋگە دايىنبىز»، — دەدى. ونىڭ كەڭسەسى ازاماتتىق ءىس بويىنشا دەرەۋ تۇسىنىكتەمە بەرمەدى.