قازاقستاندا 500-دەن استام دارىلىك زاتتىڭ قۇنى تومەندەگەنى تىركەلدى. بۇل — دارى-دارمەك باعاسىنا جۇيەلى مونيتورينگ جۇرگىزۋدىڭ ناتيجەسى، دەپ حابارلايدى infohub.kz سايتى.
اتاپ ايتقاندا، ينفەكسيالىق، جۇرەك-قان تامىرلارى اۋرۋلارىن، سونداي-اق اسقازان-ىشەك جولدارىنىڭ دەرتتەرىن ەمدەۋدە كەڭىنەن قولدانىلاتىن پرەپاراتتار ارزاندادى. تەكسەرۋ قورىتىندىسى بويىنشا، 147 اتاۋ 20%-دان استامعا، 198ء-ى 10–20%-عا، ال تاعى 244 ءدارى 5–10%-عا قولجەتىمدى بولدى. قالعان 1267 پرەپاراتتىڭ باعاسى وزگەرىسسىز قالدى.
«ءقازىر الەۋمەتتىك جەلىلەر قارقىندى دامىعان تۇستا كوپتەگەن دارىلىك پرەپاراتتار جارنامالانىپ، حابارلاندىرۋلار ارقىلى ساتىلۋدا، الايدا ولار تىركەلمەگەن بولۋى مۇمكىن. مۇنداي فاكتىلەرگە تاپ بولساڭىز، بىزگە حابارلاسىڭىز. زاڭ بويىنشا ءاربىر پرەپارات تىركەۋدەن ءوتۋى ءتيىس. مەملەكەتتىك باعا رەتتەۋىنە 3039 رەسەپت بويىنشا بەرىلەتىن دارىلىك زات جاتادى»، — دەدى ق ر دەنساۋلىق ساقتاۋ مينيسترلىگى مەديسينالىق جانە فارماسەۆتيكالىق باقىلاۋ كوميتەتى دەپارتامەنتىنىڭ باسشىسى ءدامىر داۋلەتبايەۆ.
تۇتىنۋشىلار پرەپارات قۇنىن وزدەرى دە تەكسەرە الادى. ەگەر ءدارىحاناداعى باعا كۇمان تۋدىرسا، ونى NAQTY ONIM ءموبيلدى قوسىمشاسى ارقىلى سالىستىرۋعا بولادى. 2024 جىلدىڭ 1 شىلدەسىنەن كەيىن شىعارىلعان قاپتامالارعا ارنايى Data Matrix كودى باسىلادى. ونى سمارتفون كامەراسىمەن سكانەرلەگەندە پايدالانۋشى ءوندىرۋشى، تىركەۋ دەرەكتەرى، تاڭبالاۋ مارتەبەسى جانە تاۋاردىڭ جەتكىزۋ تىزبەگى بويىنشا قوزعالىسى تۋرالى اقپارات الادى.
«قوسىمشا تاۋارلاردى سيفرلىق تاڭبالاۋ مەن قاداعالاۋدىڭ مەملەكەتتىك جۇيەسى اياسىندا ازىرلەندى. ونى قولدانۋ فارماسەۆتيكالىق نارىقتىڭ اشىقتىعىن ارتتىرۋعا ىقپال ەتەدى. پايدالانۋشى وسى قوسىمشا ارقىلى پرەپاراتتىڭ قۇنىن ءبىلىپ، ونى ءدارىحاناداعى باعامەن سالىستىرا الادى»، — دەدى ق ر دسم مەديسينالىق جانە فارماسەۆتيكالىق باقىلاۋ كوميتەتى ءبولىمىنىڭ باسشىسى ءجاميلا ءماديماروۆا.
ەلدە قاتار تۇردە كونترافاكتىلىك جانە تاڭبالانباعان دارىلەردى انىقتاۋ مەن الىپ تاستاۋ جۇمىستارى كۇشەيتىلۋدە. 2026 جىلدىڭ ءبىرىنشى جارتىجىلدىعىندا شەكتى باعانىڭ اسىپ كەتۋىنىڭ التى جاعدايى انىقتالدى. بۇزۋشىلارعا قاتىستى اكىمشىلىك شارالار قولدانىلىپ، سالىنعان ايىپپۇلداردىڭ جالپى سوماسى 1،4 ميلليون تەڭگەنى قۇرادى.