قازاقستاننىڭ حالىق ءارتىسى ديماش قۇدايبەرگەن قاراعاندىداعى كونسەرتتەن كەيىن 700 مەتر تەرەڭدىككە ءتۇسىپ، كەنشىلەردى كاسىبي مەرەكەلەرىمەن جەكە ءوزى قۇتتىقتادى، دەپ حابارلايدى infohub.kz سايتى.
كەنشىلەر كۇنىنە ارنالعان، شامامەن 250 مىڭ كورەرمەن جيناعان كونسەرتتەن كەيىن ءانشى Qarmet كومپانياسىنىڭ كوستەنكو اتىنداعى شاحتاسىنا باردى. ول الەۋمەتتىك جەلىدەگى پاراقشاسىندا اسەرىمەن ءبولىستى: "جەر استىنا 700 مەتر تەرەڭدىككە ءتۇستىم، كەنشىلەردىڭ قانداي جاعدايدا جۇمىس ىستەيتىنىن، بۇل قانشالىقتى قيىن ءارى جاۋاپتى ەڭبەك ەكەنىن ءوز كوزىممەن كوردىم. ماعان شاحتانىڭ جۇمىسىن، جەر استىنداعى ادامداردىڭ ورنىن باقىلاۋعا مۇمكىندىك بەرەتىن زاماناۋي قاۋىپسىزدىك جۇيەلەرى مەن پوزيسيالاۋ جۇيەلەرىن كورسەتتى. شاحتالاردىڭ جاڭارىپ جاتقانى قۋانتادى. ءبىراق ەڭ باستىسى - كەنشىلەرمەن جەكە كەزدەسىپ، ولاردى كاسىبي مەرەكەمەن قۇتتىقتاۋ مۇمكىندىگى بولدى. بۇل ماماندىق يەلەرىنە زور قۇرمەت. سىزدەردىڭ ەڭبەكتەرىڭىز ەرەكشە قۇرمەتكە لايىق! كەنشىلەر كۇنى قۇتتى بولسىن! مىقتى دەنساۋلىق، اماندىق جانە ءقاۋىپسىز اۋىسىمدار تىلەيمىن!".
ءارتىس جانكۇيەرلەرى تۇسىنىكتەمەلەردە ونىڭ بۇل ارەكەتىنە ءتانتى بولىپ، وعان دەنساۋلىق پەن شىعارماشىلىق شابىت تىلەدى. ەسكە سالايىق، بۇعان دەيىن ديماش قازان ايىنا دەيىن ءۇزىلىس الاتىنىن حابارلاعان ەدى.