ەۋرازيالىق ەكونوميكالىق وداق ەلدەرىنەن اكەلىنىپ، قازاقستاندا ۋاقىتشا ەسەپتە تۇرعان كولىك يەلەرى بەس جىلدىق مەرزىم بىتكەن سوڭ ونىڭ تاعدىرىن شەشۋگە ءماجبۇر. ءبىر نۇسقا — ۋاقىتشا ەسەپتەن كەيىن كولىكتى 200 مىڭ تەڭگەگە باستاپقى تىركەۋ ارقىلى زاڭداستىرۋ، دەپ حابارلايدى infohub.kz سايتى.
ۋاقىتشا تىركەۋ مەرزىمى بەس جىلدى قۇرايدى، سوندىقتان وسى سحەما بويىنشا راسىمدەلگەن العاشقى جەڭىل كولىكتەر، شاعىن اۆتوبۋستار مەن جەڭىل جۇك كولىكتەرى 2028 جىلدىڭ جازىندا شەكتى مەرزىمگە جەتەدى.
بەس جىلدان كەيىن نە ىستەۋ كەرەك
كولىك يەسى ونى قازاقستاننان شىعارا الادى نەمەسە ەلدە تۇراقتى ەسەپكە قويا الادى. ەكىنشى نۇسقا ءۇشىن مىنالار قاجەت:
كولىكتى ۋاقىتشا ەسەپتەن شىعارۋ؛
ونى بۇرىنعى ەسەپكە الىنعان ەلدە تىركەۋ ماسەلەسىن شەشۋ؛
ۋاقىتشا تىركەۋدەن كەيىن زاڭداستىرۋ راسىمىنەن ءوتۋ.
باستاپقى تىركەۋ الىمى 200 مىڭ تەڭگەنى قۇرايدى، بۇل رەتتە ۋتيلسبور الىنبايدى. قوسىمشا تىركەۋ كۋالىگى مەن مەملەكەتتىك ءنومىر بەلگىلەرى ءۇشىن تولەۋگە تۋرا كەلەدى. جەڭىلدىك مولشەرلەمەسىن قولدانۋ ءۇشىن كولىك ارنايى رەجيم تالاپتارىنا ساي بولۋى ءتيىس. اتاپ ايتقاندا، ۇكىمەتتىڭ №13 قاۋلىسىنىڭ تالاپتارىنا سايكەس كەلەتىن كولىكتەر تۋرالى ايتىلىپ وتىر.
تىركەۋ مەرزىمى بىتكەن سوڭ نە بولادى
ۋاقىتشا ەسەپ مەرزىمى اياقتالعان سوڭ كۋالىك كۇشىن جويادى. جاڭا قۇجاتتار راسىمدەلگەنگە دەيىن مۇنداي كولىكتى قازاقستان اۋماعىندا پايدالانۋعا بولمايدى. تىركەلمەگەن كولىكتى باسقارعانى ءۇشىن 10 ايلىق ەسەپتىك كورسەتكىش (2026 جىلى 43 250 تەڭگە) مولشەرىندە ايىپپۇل سالىنادى، ال كولىكتىڭ ءوزى بۇزۋشىلىق جويىلعانشا ارنايى تۇراققا قويىلۋى مۇمكىن.
وسىلايشا، 2022 جىلدىڭ 1 قىركۇيەگىنە دەيىن اكەلىنگەن كولىك يەلەرى ۋاقىتشا تىركەۋ مەرزىمى قاشان بىتەتىنىن الدىن الا تەكسەرىپ، ودان ءارى قانداي نۇسقانى تاڭدايتىنىن شەشكەن ءجون.
بۇعان دەيىن «كۋرسيۆ اۆتو» قازاقستاندا ەاەو-دان اكەلىنگەن كولىكتەردىڭ ۋاقىتشا تىركەۋ مەرزىمى ءبىتىپ كەلە جاتقانىن حابارلاعان.