قاراعاندىداعى قىلمىستىق ىستەر جونىندەگى سوت القاسى بوكستان وليمپيادا چەمپيونى دانيار ەلەۋسينوۆتىڭ ەكى ايەلدى ۇرىپ-سوققانى ءۇشىن سوتتالعان ايەلىنىڭ قورعاۋشىسىنىڭ اپەللياسيالىق شاعىمىن قاراپ، ءبىرىنشى ساتىداعى سوتتىڭ ۇكىمىن وزگەرىسسىز قالدىردى، دەپ حابارلايدى infohub.kz سايتى.
قاراعاندى وبلىسى سوتتارىنىڭ رەسمي Telegram-ارناسىندا جازىلعانداي، 14 قىركۇيەكتە قىلمىستىق ىستەر جونىندەگى سوت القاسى سوتتالعان ايەلگە قاتىستى قىلمىستىق ءىستى قارادى. ءىس ماتەريالدارىنا سايكەس، 2026 جىلعى 27 قاڭتاردا ساعات 21:10 شاماسىندا ول اتاسىنىڭ قورلانعانىن انىقتاۋ ءۇشىن ەكى ايەلدىڭ پاتەرىنە كەلىپ، تۋىنداعان جانجال بارىسىندا ولاردى ۇرىپ-سوعىپ، باسقا دا زورلىق-زومبىلىق ارەكەتتەرىن جاساپ، جابىرلەنۋشىلەرگە دەنە جاراقاتىن كەلتىرگەن.
ءبىرىنشى ساتىداعى سوتتىڭ ۇكىمىمەن ول قىلمىستىق كودەكستىڭ 109-1-بابىنىڭ 2-بولىگىنىڭ 1-تارماعىندا كوزدەلگەن قىلمىستىق قۇقىق بۇزۋشىلىق جاساعانى ءۇشىن كىنالى دەپ تانىلىپ، وعان 100 ايلىق ەسەپتىك كورسەتكىش مولشەرىندە، ياعني 432 500 تەڭگە ايىپپۇل جازاسى تاعايىندالدى. سونىمەن قاتار سوتتالعان ايەلدەن ءار جابىرلەنۋشىنىڭ پايداسىنا 500 مىڭ تەڭگەدەن مورالدىق زيان وتەماقىسى، سونداي-اق وكىل قىزمەتىنە 1 ميلليون تەڭگە شىعىس ءوندىرىلدى.
«سوت القاسى سوتتالعان ايەلدىڭ قورعاۋشىسىنىڭ اپەللياسيالىق شاعىمى بويىنشا تۇسكەن قىلمىستىق ءىستى اپەللياسيالىق تارتىپپەن قايتا قاراپ، ءبىرىنشى ساتىداعى سوتتىڭ ۇكىمىن وزگەرىسسىز قالدىردى. ءبىرىنشى ساتىداعى سوتتىڭ ۇكىمى زاڭدى كۇشىنە ەندى»، — دەدى سوتتا.
ەسكە سالايىق، بوكسشى دانيار ەلەۋسينوۆتىڭ ايەلىنىڭ قاتىسۋىمەن بولعان وقيعا وسى جىلدىڭ قىسىندا مايقۇدىقتاعى ءبىر ۇيدە بولعان. بۇل رەزونانس تۋدىرعان ءىس بويىنشا ۇكىم جازدا شىعارىلعان.