قازاقستاندا جۇمىستان ايىرىلۋ جاعدايىنا بايلانىستى تولەمدەردىڭ ەڭ ۇزاق مەرزىمىن قىسقارتۋ ۋاقىتى شەگەرىلدى: بۇرىن ايتىلعانداي 2026 جىلعى 1 قازان ەمەس، جاڭاشىلدىق 2027 جىلعى 1 قاڭتاردان باستاپ كۇشىنە ەنەدى. بۇل تۋرالى ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساي وتىرىپ، infohub.kz سايتى حابارلايدى.
ۆەدومستۆونىڭ ءباسپاسوز قىزمەتى تۇسىندىرگەندەي، 1 قازاننان باستاپ مينيسترلىك جۇمىس ىزدەپ جۇرگەن ازاماتتارعا قىزمەت كورسەتۋ تاسىلدەرىن جەتىلدىرۋ جۇمىسىن كەزەڭ-كەزەڭىمەن باستايدى. ەلدە پيلوتتىق جوبا ىسكە قوسىلادى، ونىڭ اياسىندا ازاماتتاردى سۇيەمەلدەۋدىڭ جاڭارتىلعان الگوريتمى پىسىقتالىپ، مانساپ ورتالىقتارى مەن مەملەكەتتىك الەۋمەتتىك ساقتاندىرۋ قورى فيليالدارىنىڭ ماماندارى وقىتىلادى.
جاڭا ءتاسىلدىڭ باستى مىندەتى — جۇمىسقا ورنالاسۋعا كومەكتەسۋدى نەعۇرلىم ناقتى، ساپالى ءارى ەڭ الدىمەن ازاماتتىڭ ناقتى جۇمىسقا ورنالاسۋىنا باعىتتالعان ەتۋ.
«نەگىزگى وزگەرىستەردىڭ ءبىرى — جۇمىسسىز مارتەبەسىن بەرگەنگە دەيىن لايىقتى جۇمىس ىزدەۋ مەرزىمىن 2 كۇننەن 13 كۇنگە ۇلعايتۋ. بۇل مەرزىم مانساپ ورتالىعىنىڭ ماماندارىنا ازاماتتىڭ كاسىبي تاجىريبەسىن، داعدىلارى مەن قاجەتتىلىكتەرىن نەعۇرلىم ەگجەي-تەگجەيلى انىقتاۋعا، پروفيلدەۋ جۇرگىزۋگە، لايىقتى بوس ورىنداردى تاڭداۋعا، جۇمىس بەرۋشىلەرمەن ءوزارا ءىس-قيمىلدى ۇيىمداستىرۋعا مۇمكىندىك بەرەدى. وسىلايشا، ازاماتتىڭ مانساپ ورتالىعىنا جۇگىنۋى تىركەۋدىڭ فورمالدى ءراسىمى رەتىندە ەمەس، تۇپكى ماقساتى جۇمىسقا ورنالاسۋ بولىپ تابىلاتىن تولىققاندى مانساپتىق باعىت رەتىندە قاراستىرىلاتىن بولادى»، — دەپ ءتۇسىندىردى مينيسترلىكتە.
ايتا كەتەيىك، پيلوتتىق جوبا ءبىر مەزگىلدە جۇمىسپەن قامتۋ جۇيەسىن ودان ءارى وزگەرىستەرگە پراكتيكالىق دايىنداۋ كەزەڭى بولادى. پيلوت بارىسىندا مانساپ ورتالىقتارى مەن مەملەكەتتىك الەۋمەتتىك ساقتاندىرۋ قورى فيليالدارىنىڭ ماماندارى جاڭارتىلعان بيزنەس-پروسەستەر مەن ازاماتتارمەن جۇمىس الگوريتمدەرى بويىنشا قوسىمشا وقىتۋدان وتەدى.
«پيلوت وتكىزىلەتىن كەزەڭدە جۇمىستان ايىرىلۋ جاعدايىنا بايلانىستى الەۋمەتتىك تولەم قولدانىستاعى تارتىپكە سايكەس بەرىلەدى. اتالعان تولەمگە قۇقىعى بار ازاماتتار ونى زاڭنامادا بەلگىلەنگەن شارتتارمەن الۋ مۇمكىندىگىن ساقتايدى. قازاقستان رەسپۋبليكاسىنىڭ الەۋمەتتىك كودەكسىنە ءتيىستى تۇزەتۋلەر 2026 جىلعى 11 ماۋسىمدا بەكىتىلگەن قازاقستان رەسپۋبليكاسىنىڭ زاڭىمەن كوزدەلگەن. 2027 جىلعى 1 قاڭتاردان باستاپ جۇمىستان ايىرىلۋ جاعدايىنا بايلانىستى الەۋمەتتىك تولەمدى بەرۋدىڭ ەڭ ۇزاق مەرزىمى زاڭنامادا بەلگىلەنگەن شارتتارعا سايكەس ءۇش ايعا دەيىن قۇرايتىن بولادى. وسىلايشا، 2026 جىلعى 1 قازان — جۇمىسپەن قامتۋ قىزمەتىنىڭ جۇمىسىن جەتىلدىرۋ جانە لايىقتى جۇمىس ىزدەۋ مەرزىمىن 13 كۇنگە ۇلعايتۋ جونىندەگى پيلوتتىق كەزەڭنىڭ باستالۋ كۇنى، ال جۇمىستان ايىرىلۋ جاعدايىنا بايلانىستى الەۋمەتتىك تولەمنىڭ ۇزاقتىعىنا قاتىستى وزگەرىستەردىڭ ءوزى 2027 جىلعى 1 قاڭتاردان باستاپ كۇشىنە ەنەدى»، — دەپ اتاپ ءوتتى ەڭبەك مينيسترلىگىندە.
زاڭنامالىق وزگەرىستەر كۇشىنە ەنگەنگە دەيىن مينيسترلىك ەلدىڭ بارلىق وڭىرلەرىندە كەڭ كولەمدە ءاقپاراتتىق-تۇسىندىرۋ جۇمىستارىن ۇيىمداستىراتىنى حابارلانادى.
ەسكە سالايىق، بۇعان دەيىن ءبىز قازاقستاندىقتار جۇمىستان ايىرىلعان جاعدايدا «جۇمىسسىزدىق جاردەماقىسىن» راسىمدەي الاتىنىن جازعان بولاتىنبىز. وندا 1 قازاننان باستاپ تولەمدەردى ءۇش اي بويى الۋعا بولاتىنى ايتىلعان ەدى.