ەڭبەك جانە حالىقتى الەۋمەتتىك قورعاۋ مينيسترلىگى جۇمىستان ايىرىلۋ جاعدايىنا بايلانىستى الەۋمەتتىك تولەمنىڭ مەرزىمىن ناقتىلادى: تولەمنىڭ ەڭ ۇزاق كەزەڭى بۇرىن حابارلانعانداي 2026 جىلعى 1 قازاندا ەمەس، 2027 جىلعى 1 قاڭتاردان باستاپ ءۇش ايعا قىسقارادى، دەپ حابارلايدى infohub.kz سايتى.
2026 جىلعى 1 قازاندا تەك جۇمىسپەن قامتۋ قىزمەتتەرىنىڭ جۇمىسىن جاڭارتۋعا ارنالعان پيلوتتىق كەزەڭ باستالادى. ونىڭ اياسىندا جۇمىسسىز مارتەبەسىن بەرگەنگە دەيىن لايىقتى جۇمىس ىزدەۋ مەرزىمى ەكى كۇننەن 13 كۇنگە ۇزارتىلادى.
مينيسترلىكتىڭ تۇسىندىرۋىنشە، وسى ۋاقىت ىشىندە مانساپ ورتالىقتارىنىڭ ماماندارى ىزدەنۋشىنىڭ كاسىبي تاجىريبەسىن، داعدىلارى مەن قاجەتتىلىكتەرىن تولىعىراق باعالاپ، بەيىندەۋ جۇرگىزىپ، بوس ورىنداردى ىرىكتەپ، جۇمىس بەرۋشىلەرمەن ءوزارا ارەكەتتەسۋى ءتيىس.
وسىلايشا، ازاماتتىڭ مانساپ ورتالىعىنا جۇگىنۋىن فورمالدى تىركەۋ رەتىندە ەمەس، جۇمىسقا ورنالاسۋدىڭ تولىققاندى جولى رەتىندە قاراستىرۋ جوسپارلانىپ وتىر.
پيلوت سونداي-اق مانساپ ورتالىقتارى مەن مەملەكەتتىك الەۋمەتتىك ساقتاندىرۋ قورى فيليالدارىنىڭ ماماندارىن وقىتۋدى كوزدەيدى. نەگىزگى نازار بەيىندەۋ ساپاسىنا، بوس ورىنداردى ىرىكتەۋگە، ازاماتتاردى جۇمىسقا ورنالاسقانعا دەيىن سۇيەمەلدەۋگە جانە ناتيجەلەردى اقپاراتتىق جۇيەلەردە دۇرىس كورسەتۋگە اۋدارىلادى.
سونىمەن قاتار پيلوت كەزەڭىندە جۇمىستان ايىرىلۋ جاعدايىنا بايلانىستى الەۋمەتتىك تولەم قولدانىستاعى ەرەجەلەر بويىنشا تاعايىندالادى. وعان قۇقىعى بار ازاماتتار اقشانى بۇرىنعى شارتتارمەن الۋ مۇمكىندىگىن ساقتايدى.
تولەم ۇزاقتىعىنداعى وزگەرىستەر 2027 جىلعى 1 قاڭتاردان باستاپ كۇشىنە ەنەدى. ءتيىستى تۇزەتۋلەر الەۋمەتتىك كودەكسكە 2026 جىلعى 11 ماۋسىمداعى زاڭمەن ەنگىزىلگەن.
بۇعان دەيىن «كۋرسيۆ» ەڭبەك مينيسترلىگى جۇمىستان ايىرىلۋ بويىنشا تولەمنىڭ ەڭ ۇزاق مەرزىمىن 2026 جىلعى 1 قازاندا ءۇش ايعا قىسقارتاتىنىن حابارلاعانىن جازعان. سوندا ۆەدومستۆو تولەم ۇزاقتىعى ساقتاندىرۋ وتىلىنە بايلانىستى بولاتىنىن دا اتاپ وتكەن: 6 ايدان 12 ايعا دەيىنگى وتىلدە — ءبىر اي، 12 ايدان 24 ايعا دەيىن — ەكى اي، 24 ايدان باستاپ — ءۇش اي. سونىمەن قاتار تولەمنىڭ ەڭ جوعارى مولشەرى جەتى ەڭ تومەنگى جالاقىنىڭ 45 پايىزىنان ەسەپتەلۋى ءتيىس.