ەڭبەك جانە حالىقتى الەۋمەتتىك قورعاۋ مينيسترلىگى اۋتيستىك سپەكتر بۇزىلىسى (اسب) دياگنوزى قويىلعان بالالارمەن جۇمىس تاسىلدەرىن وزگەرتپەك. ۇلتتىق الەۋمەتتىك قورعاۋ ورتالىعى الەۋمەتتىك قىزمەتكەرلەرگە ارنالعان پراكتيكالىق قۇرال جاساۋعا كىرىستى، دەپ حابارلايدى infohub.kz سايتى.
اتالعان قۇرال ماماندارعا ءاربىر ءاۋتيزمى بار بالاعا جەكە كوزقاراس تابۋعا كومەكتەسۋى ءتيىس.
«وندا ناقتى جاعداي مەن وتباسىنىڭ سۇرانىسىن ەسكەرە وتىرىپ، جۇمىستى كەزەڭ-كەزەڭىمەن قۇرۋعا مۇمكىندىك بەرەتىن تۇسىنىكتى الگوريتمدەر مەن ۇسىنىمدار بەرىلەدى»، — دەلىنگەن حابارلامادا.
قۇرالدا الەۋمەتتىك قىزمەتكەردىڭ وتباسىمەن قارىم-قاتىناستى نولدەن باستاپ قالاي قۇرۋى كەرەكتىگى ەگجەي-تەگجەيلى جازىلادى: العاشقى اڭگىمەدەن باستاپ نەگىزگى ماسەلەلەردى تۇسىنۋگە جانە بىرلەسكەن ءىس-قيمىل جوسپارىن جاساۋعا دەيىن. سونىمەن قاتار، دارىگەرلەر مەن پەداگوگتاردى كومەككە قالاي تارتۋ، سودان كەيىن بۇل قولداۋدىڭ بالا مەن ونىڭ جاقىندارىنا شىنىمەن كومەكتەسكەنىن قالاي باعالاۋ كەرەكتىگى تۇسىندىرىلەدى.
بۇل رەتتە الەۋمەتتىك قىزمەتكەرلەردىڭ بارلىق جۇمىسى بالانىڭ وتباسىمەن ءوزارا ءىس-قيمىل پرينسيپىنە عانا نەگىزدەلەدى، ويتكەنى جاقىندارى بالاسىنىڭ قاجەتتىلىكتەرىن باسقالاردان جاقسى بىلەدى.
قۇجاتتا ناقتى نە جازىلاتىنى ازىرگە بەلگىسىز. ەڭبەك جانە حالىقتى الەۋمەتتىك قورعاۋ مينيسترلىگى الەۋمەتتىك قىزمەتكەرلەر مەن اسب بار بالا تاربيەلەپ وتىرعان وتباسىلار اراسىنداعى ءوزارا ءىس-قيمىل تاجىريبەسى ءالى زەرتتەلىپ جاتقانىن اتاپ ءوتتى.
ۆەدومستۆو اسب — بالانىڭ وزگەشە قارىم-قاتىناس جاسايتىن، ءوزىن ۇستايتىن جانە الەمدى قابىلدايتىن دامۋ ەرەكشەلىگى ەكەنىن اتاپ ءوتتى. ەكى بىردەي جاعداي بولمايدى. ءار بالانىڭ ءوز تالانتى، قيىندىقتارى مەن قاجەتتىلىكتەرى بار. سوندىقتان الەۋمەتتىك قىزمەتكەرلەرگە ۇلگى بويىنشا ارەكەت ەتۋگە بولمايدى، ءار وتباسىعا كومەكتى جەكە تاڭداۋ قاجەت.
بۇعان دەيىن سانيتاريالىق-ەپيدەميولوگيالىق باقىلاۋ كوميتەتى دۇنيەجۇزىلىك دەنساۋلىق ساقتاۋ ۇيىمىنىڭ سوڭعى 15 جىلداعى شولۋىنىڭ ناتيجەلەرىن جاريالاعان بولاتىن. اتاپ ايتقاندا، مەتا-تالداۋ ەكپەلەردىڭ اسب دامۋ ءقاۋپىن ارتتىرمايتىنىن كورسەتتى.