باتىس قازاقستان وبلىسىندا سوت ەپيلەپسياسى بار جەرگىلىكتى تۇرعىندى جۇرگىزۋشى كۋالىگىنەن ايىردى. وبلىستىق پوليسيا دەپارتامەنتى تالاپ قويعان، سوت ونى قاناعاتتاندىردى، دەپ حابارلايدى infohub.kz سايتى.
باتىس قازاقستان وبلىسى سوتتارىنىڭ رەسمي Telegram-ارناسىنىڭ مالىمەتىنشە، جاڭعالا اۋداندىق سوتى پوليسيا دەپارتامەنتىنىڭ ەر ادامعا قاتىستى تالاپ ارىزى بويىنشا ازاماتتىق ءىستى قارادى. تالاپ كولىك قۇرالدارىن باسقارۋ قۇقىعىن توقتاتۋ جانە جۇرگىزۋشى كۋالىگىن تاپسىرۋدى مىندەتتەۋ بولدى.
ءىس بارىسىندا جاۋاپكەردىڭ 2017 جىلعى 29 تامىزدا «ۆ» ساناتىنداعى جۇرگىزۋشى كۋالىگىن العانى انىقتالدى. الايدا مەديسينالىق مەكەمەنىڭ دەرەكتەرى بويىنشا، ول G40.8 — «ەپيلەپسيانىڭ باسقا ناقتىلانعان تۇرلەرى» دياگنوزىمەن ديسپانسەرلىك ەسەپتە تۇر.
قولدانىستاعى زاڭناماعا سايكەس، جۇرگىزۋشىنىڭ دەنساۋلىق جاعدايىنىڭ ناشارلاۋى كولىك قۇرالدارىن ءقاۋىپسىز باسقارۋعا كەدەرگى كەلتىرسە جانە مەديسينالىق قورىتىندىمەن راستالسا، بۇل كولىك باسقارۋ قۇقىعىن توقتاتۋعا نەگىز بولادى. سوت جاۋاپكەردەگى اۋرۋدىڭ مەديسينالىق قارسى كورسەتىلىمدەر تىزىمىنە كىرەتىنىن جانە اۆتوموبيل باسقارۋعا ءابسوليۋتتى قارسى كورسەتىلىم ەكەنىن انىقتادى.
بارلىق ءمان-جايلاردى ەسكەرە وتىرىپ، سوت تالاپتى قاناعاتتاندىردى. جۇرگىزۋشى كۋالىگىنىڭ قولدانىسى توقتاتىلىپ، ەر ادام ونى بقو پد بولىمشەسىنە تاپسىرۋعا مىندەتتەلدى. سوت شەشىمى ازىرگە زاڭدى كۇشىنە ەنگەن جوق.