الەۋمەتتىك مەديسينالىق ساقتاندىرۋ قورى (ءامقق) Qalqan سيفرلىق پلاتفورماسىنىڭ پيلوتتىق جوباسىن 16 مەديسينالىق ۇيىمعا دەيىن كەڭەيتتى. جۇيە مەديسينالىق كومەكتى جوسپارلاۋ، ساتىپ الۋ، مونيتورينگ جانە تولەۋ پروسەستەرىن بىرىكتىرۋى ءتيىس. بارلىق ءتورت پروسەستى سيفرلاندىرۋدى 2026 جىلدىڭ سوڭىنا دەيىن اياقتاۋ جوسپارلانۋدا، دەپ حابارلايدى infohub.kz سايتى.
ايتا كەتەيىك، تولەمنىڭ تولىق سيكلى استاناداعى ءۇش مەديسينالىق ۇيىمدا سىناقتان ءوتتى. مۇندا تولەنگەن مەديسينالىق كومەكتىڭ جالپى سوماسى 2،97 ملرد تەڭگەنى قۇرادى.
دەگەنمەن، ازىرگە مەديسينالىق كومەكتىڭ 92 ءتۇرى مەن كىشى ءتۇرىنىڭ تەك 20-سى بويىنشا سىناق جۇرگىزىلدى. 16 مەديسينالىق ۇيىمنىڭ بازاسىندا 60 ءتۇر مەن كىشى ءتۇر بويىنشا سىناق جۇرگىزۋ جوسپارلانۋدا.
ءامقق-دا Qalqan-دا تولەمدى پيلوتتىق رەجيمدە سىناۋمەن قاتار مەديسينالىق ۇيىمدار تۋرالى مالىمەتتەر دە ەنگىزىلەتىنىن اتاپ ءوتتى. بۇل ليسەنزيالار، كادرلىق قۇرام، جابدىقتار، قۋاتتار جانە باسقا دا مالىمەتتەر تۋرالى اقپارات. وسى باعىتتا 1،7 مىڭنان استام مەديسينالىق ۇيىم مەن 12،4 مىڭ وندىرىستىك بازا تۋرالى مالىمەتتەر جۇيەلەندى.
«بولاشاقتا قارجىلاندىرۋ كولەمىن ەسەپتەۋ مەن مەديسينالىق كومەككە اقى تولەۋدىڭ دۇرىستىعى وسى دەرەكتەردىڭ دۇرىستىعى مەن تولىقتىعىنا تىكەلەي بايلانىستى بولاتىندىقتان، ولاردىڭ دۇرىستىعى مەن تولىقتىعىنا ەرەكشە نازار اۋدارۋ قاجەت»، – دەلىنگەن قور حابارلاماسىندا.
سونداي-اق، Qalqan سيفرلىق سەرۆيسىن كەڭەيتۋ اياسىندا ءامقق « قىزىل تۇيمەنى» ەنگىزگەنى حابارلاندى. ەندى ارنايى QR-كود ارقىلى ەمحانا باسشىلارى تولەمدەردىڭ كەشىگۋى، سىبايلاس جەمقورلىق جانە قارجىلاندىرۋداعى اقاۋلار تۋرالى ءامقق باسشىسىنا تىكەلەي حابارلاي الادى.
بۇعان دەيىن «كۋرسيۆ» قازاقستاندا ءمامس جۇيەسىندەگى قارجىلىق باقىلاۋ ءتاسىلى وزگەرتىلەتىنىن حابارلاعان بولاتىن.