قوستاناي وبلىسىنىڭ تۇرعىنى كاسىپكەرلىكتى دامىتۋعا بەرىلگەن 1،38 ملن تەڭگە كولەمىندەگى گرانتتى پروكۋراتۋرا اقشانىڭ ماقساتسىز جۇمسالعانىن انىقتاعان سوڭ بيۋدجەتكە قايتاردى، دەپ حابارلايدى infohub.kz سايتى.
ۆەدومستۆونىڭ رەسمي سايتىندا حابارلانعانداي، اۋليەكول اۋدانىنىڭ پروكۋراتۋراسى 2023 جىلى ازاماتقا كاسىپكەرلىك جوبانى جۇزەگە اسىرۋعا 1 380 000 تەڭگە كولەمىندە مەملەكەتتىك گرانت بەرىلگەنىن انىقتادى.
الايدا گرانت قاراجاتىنا ساتىپ الىنعان جابدىق ءىس جۇزىندە كورسەتىلگەن ماقساتتا پايدالانىلماعان. سونىمەن قاتار، ونىڭ تەحنيكالىق سيپاتتامالارى ەسەپتىك قۇجاتتاردا كورسەتىلگەن مالىمەتتەرگە سايكەس كەلمەگەن.
اۋليەكول اۋدانى پروكۋراتۋراسىنىڭ ماتەريالدارى بويىنشا الاياقتىق بەلگىلەرى بويىنشا سوتقا دەيىنگى تەرگەۋ باستالدى.
تەرگەۋ بارىسىندا گرانت الۋشى مەملەكەتكە كەلتىرىلگەن زالالدى تولىق وتەپ، بارلىق سومانى بيۋدجەتكە ەرىكتى تۇردە قايتاردى.
كىناسىن مويىنداۋى، زالالدى ەرىكتى تۇردە وتەۋى جانە زاڭدا كوزدەلگەن وزگە دە ءمان-جايلار ەسكەرىلىپ، قىلمىستىق ءىس اقتالمايتىن نەگىزدەر بويىنشا قىسقارتىلدى.