ماڭعىستاۋ وبلىسىندا ساپاسىز گۇل شوعى تۇتىنۋشىعا اۋىستىرىلىپ بەرىلدى، دەپ حابارلايدى infohub.kz.
قازاقستان رەسپۋبليكاسى ساۋدا جانە ينتەگراسيا مينيسترلىگى تۇتىنۋشىلاردىڭ قۇقىقتارىن قورعاۋ كوميتەتىنىڭ رەسمي سايتىندا حابارلانعانداي، ماڭعىستاۋ وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە سىيلىققا ساتىپ الىنعان گۇل شوعىنىڭ ساپاسىنا قاتىستى تۇتىنۋشىنىڭ ءوتىنىشى تۇسكەن.
تۇتىنۋشى ساتۋشىدان گۇل شوعىن الدىن الا تاپسىرىسپەن، ۇسىنىلعان بۋكەتتىڭ فوتوسۋرەتىنە قاراپ تاڭداعان. الايدا تاپسىرىستى العاننان كەيىن كومپوزيسيانىڭ ناقتى ءتۇرى كورسەتىلگەن ۇلگىدەن ايتارلىقتاي ەرەكشەلەنگەنى انىقتالدى. اتاپ ايتقاندا، گۇلدەر سولىپ قالعان، بالعىن ەمەس جانە كۇتىلگەن سىرتقى تۇرگە سايكەس كەلمەگەن.
بۋكەت سىيلىققا ساتىپ الىنعاندىقتان، تۇتىنۋشى تاپسىرىس بەرۋ كەزىندە ۇسىنىلعان ۇلگىگە سايكەس كەلەتىن ساپالى گۇل شوعىن الۋعا ۇمىتتەنگەن.
تاۋاردى العاننان كەيىن تۇتىنۋشى ساتۋشىعا جۇگىنىپ، بۋكەتتىڭ تاپسىرىس بەرىلگەن ۇلگىگە سايكەس كەلمەيتىنىن ايتىپ، تۋىنداعان جاعدايدى رەتتەۋدى سۇراعان. الايدا ونىڭ تالابى باستاپقىدا قاناعاتتاندىرىلماعان.
وسىعان بايلانىستى تۇتىنۋشى ءوز قۇقىقتارىن قورعاۋعا جاردەمدەسۋ ءۇشىن ماڭعىستاۋ وبلىسى بويىنشا ساۋدا جانە تۇتىنۋشىلاردىڭ قۇقىقتارىن قورعاۋ دەپارتامەنتىنە جۇگىنگەن.
ۆەدومستۆو ماماندارى ءوتىنىشتى قاراپ، ساتۋشىعا قازاقستان رەسپۋبليكاسىنىڭ تۇتىنۋشىلاردىڭ قۇقىقتارىن قورعاۋ سالاسىنداعى زاڭناما تالاپتارىن ساقتاۋ جانە ساتىپ الۋشى الدىنداعى مىندەتتەمەلەردى ورىنداۋ قاجەتتىگى تۋرالى تۇسىندىرمە جۇمىستارىن جۇرگىزگەن.
جۇرگىزىلگەن جۇمىستىڭ ناتيجەسىندە داۋ سوتقا دەيىن رەتتەلگەن. ساتۋشى تۇتىنۋشىنىڭ تالابىن قاناعاتتاندىرىپ، ۇسىنىلعان ۇلگىگە سايكەس كەلەتىن، بالعىن جانە ساپالى جاڭا گۇل شوعىن بەرگەن.