جىل باسىنان بەرى قازاقستاننىڭ ىشكى ىستەر ورگاندارى دىني-ەكسترەميستىك يدەيالاردى جامىلعان 22 قىلمىستىق توپتىڭ جولىن كەستى. ولاردىڭ قۇرامىنان 64 ادام ۇستالدى، دەپ حابارلايدى infohub.kz سايتى.
ىشكى ىستەر مينيسترلىگىنىڭ اقپاراتتىق مەدياپورتالىنىڭ مالىمەتىنشە، ۇستالعاندار قورقىتىپ الۋ، الاياقتىق جانە توناۋ، براكونەرلىك جانە ەسىرتكى ساتۋمەن ايىپتالعان. قىلمىستىق ارەكەتتەرى ءۇشىن ولار اتىس قارۋىن ساقتاعان.
«مۇنداي توپتار ەلدىڭ ءتۇرلى وڭىرلەرىندە، ونىڭ ىشىندە الماتىدا، اقتوبە، اتىراۋ، جامبىل، ماڭعىستاۋ جانە باتىس قازاقستان وبلىستارىندا ارەكەت ەتتى»، — دەدى ىىم-دە.
ماسەلەن، الماتىدا راديكالدى ءدىني يدەيالاردى ۇستانعان ءتورت ادام قالا تۇرعىنىنان 7،5 ملن تەڭگە ۇرلاعان. كىنالىلەر سوت ۇكىمىمەن 5 پەن 6 جىل ارالىعىندا باس بوستاندىعىنان ايىرىلدى.
پەتروپاۆلدا راديكالدى ءدىني يدەولوگيانى ۇستانعان ايەل جاساعان الاياقتىقتىڭ ءتورت ەپيزودى اشىلدى. جالپى شىعىن 2 ملن تەڭگەدەن استى. ايەل 3 جىلعا باس بوستاندىعىنان ايىرىلدى.
پاۆلوداردا راديكالدى ءدىني كوزقاراستاعى جەرگىلىكتى تۇرعىن الاياقتىقتىڭ 17 ەپيزودىن جاساعان. شىعىن 8 ملن تەڭگەدەن استى. سوت وعان 5 جىلعا باس بوستاندىعىنان ايىرۋ جازاسىن كەستى.
بارلىعى ىشكى ىستەر ورگاندارى ءدىني ەكسترەميزم يدەيالارىن ۇستانعاندار جاساعان 155 قىلمىستى اشتى. زاڭسىز اينالىمنان 114 بىرلىك اتىس جانە 3 بىرلىك سۋىق قارۋ، 7 گرانات، 1 600-دەن استام ءوق-دارى جانە 32 كگ-نان استام ەسىرتكى تاركىلەندى.
سونىمەن قاتار پوليسيا ەكسترەميستىك جانە تەرروريستىك قىلمىستاردى، ونىڭ ىشىندە ينتەرنەتتە راديكالدى يدەولوگيانى تاراتۋدى انىقتاپ، جولىن كەسۋدە.
اقتوبەدە قالا تۇرعىنى الەۋمەتتىك جەلىلەردە وزگە ءدىني ۇستانىمداعى ادامداردى قورلاپ، ءدىني ارازدىقتى اشىق تۇتاندىرعان. ول 3 جىل 6 ايعا باس بوستاندىعىنان ايىرىلدى.
سونداي-اق اقتوبەدە زورلىق-زومبىلىق اكسيالارىن جوسپارلاعان راديكالدى كوزقاراستاعى جاس جىگىت ۇستالدى. تەرروريزمدى ناسيحاتتاعانى ءۇشىن سوت وعان 6 جىلعا باس بوستاندىعىنان ايىرۋ جازاسىن تاعايىندادى.
تۇركىستان وبلىسىندا «وزبەكستان يسلام قوزعالىسى» حالىقارالىق تەرروريستىك ۇيىمىنىڭ يدەيالارىن ينتەرنەتتە بەلسەندى تاراتقان راديكالدى ءدىني يدەولوگيانى ۇستانۋشى ۇستالدى. ول 7 جىلعا باس بوستاندىعىنان ايىرىلدى.
«ءدىني سەنىمدەر قىلمىسقا، زورلىق-زومبىلىققا جانە ارازدىق تۇتاندىرۋعا اقتاۋ بولا المايدى. ءىىم ازاماتتاردى قورعاۋ، قىلمىستىق ارەكەتتىڭ جولىن كەسۋ جانە زورلىق-زومبىلىق پەن ءدىني ارتىقشىلىق يدەولوگياسىنىڭ تارالۋىنا جول بەرمەۋ جۇمىسىن جالعاستىرۋدا. بۇل جۇمىس قوعامداعى قاۋىپسىزدىكتى قامتاماسىز ەتۋگە جانە ءتارتىپتى ساقتاۋعا باعىتتالعان»، — دەدى ۆەدومستۆودا.