قازاقستان ىشكى ىستەر مينيسترلىگى ازاماتتاردىڭ قانداي جاعدايدا پىشاق الىپ جۇرە الاتىنىن جانە قانداي شەكتەۋلەر قولدانىلاتىنىن ءتۇسىندىردى، دەپ حابارلايدى infohub.kz سايتى.
ۆەدومستۆونىڭ تۇسىندىرۋىنشە، پىشاق جاتاتىن سۋىق قارۋدى كامەلەتكە تولعان ادامدار ازاماتتىق قارۋدى ساقتاۋعا جانە الىپ جۇرۋگە رۇقساتى مەن اڭشىلىق كۋالىگى بولعان جاعدايدا عانا ساتىپ الا الادى.
«ارنايى رۇقسات پىشاقتى الىپ جۇرۋگە عانا ەمەس، ساتىپ الۋعا دا قاجەت. سونىمەن قاتار ساتىپ الىنعان سۋىق قارۋ يەسىنىڭ اڭشىلىق كۋالىگىنە ەنگىزىلۋى ءتيىس. وعان قوسا، پىشاقتى تەك مامانداندىرىلعان دۇكەندەردەن ساتىپ الۋ كەرەك»، — دەپ ءتۇسىندىردى ىشكى ىستەر مينيسترلىگى.
مينيسترلىك قارۋدىڭ جانە قۇرىلىمى جاعىنان قارۋعا ۇقساس بۇيىمداردىڭ كەز كەلگەن ءتۇرىن ساتۋ تۋرالى اقپاراتتى تۇراقتى تۇردە باقىلاپ وتىراتىنى اتاپ ءوتىلدى.
«اتالعان اقپارات راستالعان جاعدايدا قولدانىستاعى زاڭناماعا سايكەس ءتيىستى شارالار قولدانىلادى. ازاماتتىق قارۋ تەك مامانداندىرىلعان دۇكەندەردىڭ ساۋدا زالدارىندا ساتىلادى»، — دەدى ۆەدومستۆو.
سونىمەن قاتار «قارۋدىڭ جەكەلەگەن تۇرلەرىنىڭ اينالىمىن مەملەكەتتىك باقىلاۋ تۋرالى» زاڭنىڭ 7-بابى 2-تارماعىنىڭ 9-تارماقشاسىنا سايكەس، ءتيىستى تىركەۋسىز ۇزىندىعى 90 ميلليمەتردەن اساتىن سۋىق ءجۇزدى قارۋدىڭ اينالىمىنا تىيىم سالىنادى.
«پىشاقتى تۇرمىستىق ماقساتتا الىپ جۇرسەڭىز، ءجۇزىنىڭ ۇزىندىعى 9 سانتيمەتردەن اسپاۋى كەرەك. قاجەت بولعاندا پىشاقتى جولعا، كولىككە نەمەسە باسقا جەرلەرگە الىپ شىقساڭىز، وسى نورمانى ەسكەرگەن ءجون»، — دەپ ناقتىلادى ءىىم.
مينيسترلىك سونداي-اق 2026 جىلدىڭ سەگىز ايىنىڭ قورىتىندىسى بويىنشا التى جەدەل-پروفيلاكتيكالىق ءىس-شارا وتكىزىلگەنىن قوستى. ولار قارۋ قولدانۋ ارقىلى جاسالاتىن قۇقىق بۇزۋشىلىقتاردىڭ الدىن الۋعا، سونداي-اق زاڭسىز ساقتالعان قارۋ زاتتارىن انىقتاۋعا باعىتتالعان.