جاڭا وقۋ جىلىنىڭ جاقىنداۋىنا بايلانىستى ىشكى ىستەر مينيسترلىگى بارلىق اتا-انالار مەن ۇستازدارعا ۇندەۋ جاسادى، دەپ حابارلايدى infohub.kz سايتى.
ۆەدومستۆونىڭ ايتۋىنشا، وقۋ جىلى باستالعاندا بالالار ۇيدەن تىس ۋاقىتتارىن كوبەيتەدى، مەكتەپكە وزدىگىنەن بارادى، ۇيىرمەلەر مەن سەكسيالارعا قاتىسادى. وسىعان بايلانىستى ءىىم جولداعى قاراپايىم قاۋىپسىزدىك ەرەجەلەرىن قايتالاۋدىڭ ماڭىزدىلىعىن اتاپ ءوتتى.
1 قىركۇيەك قارساڭىندا بارلىق مەكتەپتەردە جول قوزعالىسى قاۋىپسىزدىگىن قامتاماسىز ەتۋ تۇرعىسىنان تەكسەرۋ جۇرگىزىلدى. سونداي-اق بالالاردى تاسىمالداۋعا ارنالعان بارلىق اۆتوبۋستار تەكسەرىلدى. انىقتالعان كەمشىلىكتەر بويىنشا نۇسقامالار بەرىلىپ، ولاردى جويۋ وقۋ جىلى باستالعانعا دەيىن قامتاماسىز ەتىلەدى.
ءىىم جولدىڭ ءجۇرۋ بولىگىن تەك رۇقسات ەتىلگەن جەرلەردەن كەسىپ ءوتۋ كەرەكتىگىن ەسكە سالادى. «تەلەفون مەن قۇلاققاپتى قويىڭىز، مۇقيات بولىڭىز. ۆەلوسيپەد، موپەد جانە ەلەكتروساموكات پايدالانعاندا جول قوزعالىسى ەرەجەلەرىن مىندەتتى تۇردە ساقتاڭىز»، — دەپ ەسكەرتتى ۆەدومستۆو.
ءتارتىپ ساقشىلارى اتا-انالارعا جەكە ۇندەۋ جاسادى: «بالاڭىزدىڭ قايدا جۇرگەنىن، كىممەن ارالاساتىنىن جانە نەمەن قىزىعاتىنىن ءبىلىڭىز. بالالارىڭىزبەن ءجيى سويلەسىڭىز. ەڭ باستىسى، قيىن جاعدايدا بالا سىزدەن كومەك سۇراۋدان قورىقپاۋى كەرەك. ەگەر بالاعا ءقاۋىپ تونسە، "102" نومىرىنە قوڭىراۋ شالىڭىز نەمەسە "111" كونتاكت-ورتالىعىنا حابارلاسىڭىز. ىشكى ىستەر مينيسترلىگى ءار بالانىڭ جاڭا وقۋ جىلى ءقاۋىپسىز ءوتۋى ءۇشىن قاجەتتى شارالاردى قابىلداۋدا. ءبىزدىڭ ورتاق مىندەتىمىز — ءقاۋىپتىڭ الدىن الۋ عانا ەمەس، بالالارعا ونى تانۋعا جانە ۋاقىتىندا كومەك سۇراۋعا ۇيرەتۋ. بالالارىڭىزدى قورعاڭىزدار»، — دەدى پوليسيا قىزمەتكەرلەرى.