قازاقستاندا ەر ادام iPhone ۇتىسى تۋرالى جالعان حابارلاما ارقىلى بىرنەشە رەت الاياقتىق جاسادى دەپ كۇدىكتەلۋدە. پوليسيا مالىمەتىنشە، ول بۇرىن جۇمىس ىستەگەن كومپانيانىڭ كليەنتتەر بازاسىن زاڭسىز يەمدەنىپ، ونى ازاماتتاردى الداۋ ءۇشىن پايدالانعان، دەپ حابارلايدى infohub.kz.
اقمولا وبلىسى پوليسيا دەپارتامەنتىندەگىلەردىڭ ايتۋىنشا، قازىرگى ۋاقىتتا ەكى جابىرلەنۋشى انىقتالعان: اقمولا وبلىسى بۋراباي اۋدانىنىڭ تۇرعىنى جانە الماتى وبلىسىنىڭ تۇرعىنى. الايدا پوليسەيلەر الدانعانداردىڭ سانى ەداۋىر كوپ بولۋى مۇمكىن ەكەنىن جوققا شىعارمايدى.
تەرگەۋ بارىسىندا جەتىسۋ وبلىسىنىڭ 33 جاستاعى تۇرعىنى بۇرىن تاۋارلاردى ساتۋمەن جانە جەتكىزۋمەن رەسمي اينالىساتىن جشس-دە جۇمىس ىستەگەنى انىقتالدى. جۇمىستان شىققاننان كەيىن ول كومپانيانىڭ كليەنتتەر بازاسىن زاڭسىز يەمدەنىپ، بۇرىن تاۋار ساتىپ العان ازاماتتارعا حابارلاسا باستاعان.
كۇدىكتى كليەنتتەرگە ولاردىڭ ۇتىس ويىنىنىڭ جەڭىمپازى اتانىپ، iPhone ۇتىپ العانىن ايتقان. ءبىراق «سىيلىقتى» الۋ ءۇشىن جەتكىزۋ قۇنىن — 55 مىڭ تەڭگەنى تولەۋ قاجەت بولعان. جابىرلەنۋشىلەر بۇرىن وسى كومپانيانىڭ قىزمەتىن پايدالانعاندىقتان، قوڭىراۋلار مەن ۇتىس تۋرالى اقپارات ولاردا كۇدىك تۋدىرماعان. سويلەسكەن ادامعا سەنىپ، ازاماتتار كورسەتىلگەن سومانى بەرىلگەن رەكۆيزيتتەرگە اۋدارعان.
قازىرگى ۋاقىتتا وسى فاكتى بويىنشا تەرگەۋ جۇرگىزىلىپ، وقيعانىڭ بارلىق ءمان-جايى، سونداي-اق كۇدىكتىنىڭ قىلمىستىق ارەكەتىنىڭ قوسىمشا ەپيزودتارى انىقتالۋدا.