كاپشاعاي سۋ قويماسىندا گيدروسيكل دەمالۋشىلار وتىرعان ۇرمەلى ديۆانعا سوعىلدى. سالدارىنان 36 جاستاعى ايەل مەن 14 جاستاعى قىز بىرنەشە سىنىق الىپ، ءبىر ايدان استام ۋاقىت وزدىگىنەن جۇرە الماي ءجۇر، دەپ حابارلايدى infohub.kz.
وقيعا شىلدە ايىنىڭ سوڭىندا بولعان. ەكى وتباسى قايىققا ارقانمەن بايلانعان ۇرمەلى ديۆاندا سەرۋەندەۋدى ۇيعارعان. زارداپ شەككەن نازيرا وسپانبەكتىڭ ايتۋىنشا، ءبىر كەزدە قايىق سۋدىڭ ورتاسىندا توقتاپ، دەمالۋشىلار جۇرگىزۋشىدەن ولاردى جاعاعا اپارۋدى وتىنگەن.
«قايىقشى قايىق پەن ديۆاندى توقتاتتى. ءسويتىپ، ءبىز سۋ ۇستىندە تۇردىق. قايىقشىعا: "ءبىزدى جاعاعا اپار" دەپ ايعايلاي باستادىق، ءبىراق ول ءبىزدى ەستىمەدى. كۇيەۋىم ىسقىرىپ: "بولدى، جەتكىلىكتى. ءبىزدى جاعاعا اپار" دەدى. سول كەزدە قايىقشى ديۆاندى سولعا بۇراتىنداي تراەكتوريامەن قوزعالا باستادى. ءدال سول ساتتە بىزگە گيدروسيكل سوعىلدى»، — دەدى نازيرا وسپانبەك.
سوققى سالدارىنان ايەلدىڭ قابىرعالارى مەن قولى بىرنەشە جەردەن سىنىپ، جامباسى سوعىلىپ، ىشكى اعزالارى زاقىمدانىپ، ميى شايقالعان. ول ءۇش وپەراسيا جاساتقان، ءبىراق ءالى كۇنگە دەيىن وزدىگىنەن جۇرە دە، وتىرا دا المايدى.
«فيزيكالىق اۋىرسىنۋ دا قاتتى مازالايدى، سەبەبى جاتقان كۇيدە قاراپايىم قاجەتتىلىكتەرىڭدى وتەي المايسىڭ. بۇل وتە قيىن. ەڭ اۋىرى — بۇعان قاتىسى بارلاردىڭ ەشقايسىسى جاۋاپكەرشىلىككە تارتىلمايدى. ولار سەنىڭ فيزيكالىق اۋىرسىنۋىڭدى بولىسە المايدى»، — دەپ ءبولىستى زارداپ شەككەن ايەل.
ونىمەن بىرگە 14 جاستاعى اسىلجان رىسكۋلوۆا دا اۋىر جاراقات العان. قىزدىڭ اياعى مەن جامباسى سىنىپ، ميى شايقالعان. وقيعادان كەيىن ءجاسوسپىرىم كوماعا ءتۇسىپ، تەك التىنشى كۇنى ەسىن جيعان.
اسىلجان وپەراسيا جاساتىپ، ءقازىر دە جۇرە دە، وتىرا دا المايدى. توعىزىنشى سىنىپ وقۋشىسى قاشىقتان وقۋىن جالعاستىرۋدا.
«اياعىنا وپەراسيا جاسادى، گيپس قويدى. ءبىر سۇيەگى ءۇش جەردەن سىنعان، سوندىقتان پلاستينا سالدى. ۇنەمى اۋىرسىنۋ باساتىن ءدارى ىشەمىز. ەموسيونالدىق جاعدايىمىز ناشار. مۇنىڭ ءبارىن كورۋ قيىن. انا رەتىندە اۋىر»، — دەدى قىزدىڭ اناسى جانار رىسكۋلوۆا.
زارداپ شەككەندەر پوليسياعا جۇگىنگەن. الماتى وبلىسى پد حابارلاعانداي، وقيعا بويىنشا قىلمىستىق ءىس قوزعالعان.
«تەڭىز نەمەسە وزەن كولىگىنىڭ قوزعالىس قاۋىپسىزدىگى نەمەسە پايدالانۋ ەرەجەلەرىن بۇزۋ فاكتىسى بويىنشا قىلمىستىق ءىس قوزعالدى»، — دەپ حابارلادى الماتى وبلىسى پد ءباسپاسوز قىزمەتى.
گيدروسيكل جۇرگىزۋشىسى ءىس بويىنشا كۇدىكتى رەتىندە ءوتىپ، ءقازىر ەركىندىكتە. زارداپ شەككەندەر سونداي-اق سۋ كولىگىن جالعا بەرگەن گيدروسيكل يەسى مەن قايىقتى باسقارعان ەر ادامدى جاۋاپكەرشىلىككە تارتۋدى تالاپ ەتۋدە.