قاراعاندىدا ون جەتى كۇزەتشى ەكى ايلىق جالاقىسى تولەنبەگەنى ءۇشىن جۇمىس بەرۋشىگە سوتقا شاعىمداندى. ناتيجەسىندە ولار ءىستى ۇتىپ، اقشالارىن الادى، دەپ حابارلايدى infohub.kz سايتى.
جوعارعى سوتتىڭ رەسمي Telegram-ارناسىندا حابارلانعانداي، قاراعاندىداعى بوكەيحان اۋدانىنىڭ سوتىنا ءجشس-تىڭ 17 كۇزەتشىسى 2025 جىلعى اقپان جانە ناۋرىز ايلارىنداعى جالاقى قارىزىن ءوندىرىپ الۋ تۋرالى تالاپپەن جۇگىنگەن.
جاۋاپكەر قارىز تاپسىرىس بەرۋشىنىڭ كەلىسىمشارتتى ءبىرجاقتى بۇزۋىنا بايلانىستى پايدا بولعانىن، كورسەتىلگەن قىزمەتتەرگە اقى تولەنبەگەنىن ءتۇسىندىردى.
ەڭبەك كودەكسىنىڭ 23-بابى 2-تارماعىنىڭ 5-تارماقشاسىنا سايكەس جۇمىس بەرۋشى ءۇشىنشى تۇلعالاردىڭ مىندەتتەمەلەردى ورىنداۋىنا قاراماستان، قىزمەتكەرلەرگە جالاقىنى ۋاقىتىلى جانە تولىق كولەمدە تولەۋگە مىندەتتى.
سوت وتىرىسى بارىسىندا تالاپكەرلەردىڭ ەڭبەك مىندەتتەرىن تولىق ورىنداعانى انىقتالدى. بۇل ۇسىنىلعان دالەلدەمەلەرمەن، ونىڭ ىشىندە كۇزەتىلەتىن نىساندارداعى كەزەكشىلىك كەستەلەرى مەن تاۋارلىق-ماتەريالدىق قۇندىلىقتاردى تىركەۋ جۋرنالدارىمەن راستالدى.
سونىمەن قاتار، قاراعاندى وبلىسىنىڭ مامانداندىرىلعان اۋدانارالىق ەكونوميكالىق سوتىنىڭ زاڭدى كۇشىنە ەنگەن شەشىمىمەن ءجشس-تىڭ كەلىسىمشارتتى بۇزعان كونتراگەنتكە قاتىستى تالابى قاناعاتتاندىرىلدى. كونتراگەنتتەن 10،8 ملن تەڭگە كولەمىندەگى قارىز ءوندىرىلدى.
ءىستى قاراۋ ناتيجەسى بويىنشا سوت مالىمدەلگەن تالاپتاردىڭ نەگىزدىلىگى تۋرالى قورىتىندىعا كەلىپ، تالاپتى تولىق قاناعاتتاندىردى. جشس-تەن بارلىق 17 قىزمەتكەردىڭ پايداسىنا ەكى ايلىق جالاقى بويىنشا 3 ملن تەڭگەدەن استام قارىز ءوندىرىلدى.
سوت شەشىمى زاڭدى كۇشىنە ەندى.