قاراعاندى وبلىسىندا سۋعا باتىپ بارا جاتقان بالانى قۇتقارعان جاس باتىردى ماراپاتتاۋ ءراسىمى ءوتتى. 13 جاستاعى نۇرالى ءالحان باتىلدىعى مەن ەرلىگى ءۇشىن ۆەدومستۆولىق مەدالمەن ماراپاتتالدى، دەپ حابارلايدى infohub.kz سايتى.
قازاقستان رەسپۋبليكاسى توتەنشە جاعدايلار مينيسترلىگىنىڭ ءباسپاسوز قىزمەتىنىڭ مالىمەتىنشە، سالتاناتتى شارا قاراعاندى وبلىسى توتەنشە جاعدايلار دەپارتامەنتىندە ءوتتى. نۇرالى راسىمگە وتباسىمەن بىرگە كەلدى.
قازاقستان رەسپۋبليكاسى توتەنشە جاعدايلار ءمينيسترى گەنەرال-لەيتەنانت چينيگيس ارينوۆتىڭ بۇيرىعىمەن سۋدا ادام قۇتقارعانى ءۇشىن نۇرالى ءالحان «سۋعا باتقانداردى قۇتقارعانى ءۇشىن» ۆەدومستۆولىق مەدالىمەن ماراپاتتالدى.
وبلىستىق تجد باستىعى گەنەرال-مايور مارعۇلان امانبايەۆ جاسوسپىرىمگە جەكە العىسىن ءبىلدىرىپ، ونىڭ ارەكەتى شىنايى قۇرمەتكە لايىق جانە قۇربىلارىنا ۇلگى ەكەنىن اتاپ ءوتتى. سونىمەن قاتار، دەپارتامەنت اتىنان وعان ەستەلىك سىيلىق تابىس ەتىلدى.
ۆەدومستۆو باتىرعا باتىلدىعى، ەرىكتىلىگى جانە قيىن ساتتە كومەككە كەلۋگە دايىندىعى ءۇشىن العىس ءبىلدىردى.
بۇعان دەيىن 13 جاستاعى قاراعاندىلىق سۋعا باتىپ بارا جاتقان 4 جاسار بالانى قۇتقارعانى حابارلانعان بولاتىن. سوندا وبلىستىق پوليسيا دەپارتامەنتىنىڭ باستىعى نەگمەت يسماعۇلوۆ جاس باتىردى وزىنە شاقىرىپ، وعان ەستەلىك سىيلىق پەن العىس حات تابىس ەتكەن ەدى.