قاراعاندى وبلىسىندا وتكەن تاۋلىكتە الدىن الا ەسەپ بويىنشا 90 گەكتار اۋماقتا بەس تابيعي ءورت ءسوندىرىلدى. شەت، بۇقار جىراۋ جانە قارقارالى اۋداندارىندا سەگىز وشاقتاعى ءورتتى ءسوندىرۋ جالعاسۋدا. بۇل تۋرالى توتەنشە جاعدايلار مينيسترلىگى حابارلادى، دەپ جازادى infohub.kz سايتى.
ورتتەر تاۋلى-دالالى جەردە قۇرعاق ءشوپ پەن بۇتالاردىڭ تۇتانۋىنان شىققان.
ءورتتى سوندىرۋگە تجم مەن جەرگىلىكتى اتقارۋشى ورگانداردان 500-دەن استام ادام جانە 145 تەحنيكا بىرلىگى جۇمىلدىرىلدى.
قارقارالى اۋدانىنىڭ بەسوبا اۋىلىندا ءورتتى سوندىرۋگە ءتجم-نىڭ سۋ توگەتىن قۇرىلعىسى بار «قازاۆياسپاس» تىكۇشاعى تارتىلدى. اۋەدەن جالپى كولەمى 12 توننا سۋ ءتورت رەت تاستالدى.
ءسوندىرۋ جۇمىسىن جەتۋ قيىن تاۋلى-دالالى بەدەر، ىستىق ءارى قۇرعاق اۋا رايى، سونداي-اق قاتتى ەكپىندى جەل قيىنداتىپ وتىر.
قاراعاندى وبلىسىنىڭ توتەنشە جاعدايلار دەپارتامەنتىندە جۇمىلدىرىلعان كۇشتەر مەن قۇرالداردىڭ جۇمىسىن ۇيلەستىرەتىن جەدەل شتاب قۇرىلدى.
قازىرگى تاڭدا ەلدى مەكەندەرگە ءقاۋىپ جوق. ءسوندىرۋ جۇمىستارى تاۋلىك بويى جالعاسۋدا.
بۇعان دەيىن «كۋرسيۆ» 7 قىركۇيەكتە قازاقستاندا ءتورت ورمان ءورتى تىركەلگەنىن جازعان بولاتىن — ەكەۋى قوستاناي وبلىسىندا، بىرەۋى شىعىس قازاقستان وبلىسىندا جانە «كوكشەتاۋ» مۇتپ اۋماعىندا. بارلىق ءورت وشاعىن وقشاۋلاپ ءسوندىرۋ مۇمكىن بولدى، وتتىڭ ۇلكەن اۋماققا تارالۋىنا جول بەرىلمەدى.