قاراعاندى وبلىسىندا 13 جاستاعى نۇرالى ءالحان ءتورت جاسار بالانى قۇتقاردى. وقيعا سەمىزبۇعا كولىندە بولعان. بالانىڭ ۇرلەمەلى ماتراسى اۋدارىلىپ، سۋعا ءتۇسىپ كەتكەن. بۇل تۋرالى infohub.kz سايتى حابارلايدى.
وقيعا تامىز ايىنىڭ باسىندا بۇقار جىراۋ اۋدانىنداعى سەمىزبۇعا كولىندە بولعان. قاتتى جەلدىڭ سالدارىنان بالا وتىرعان ماتراس اۋدارىلىپ، بالا سۋعا كەتكەن.
جاقىن جەردە بولعان نۇرالى ويلانباستان سۋعا سەكىرىپ، بالانى جاعاعا شىعارعان.
ءجاسوسپىرىمنىڭ ەرلىگى الەۋمەتتىك جەلىلەردە تاراعان. وسىدان كەيىن قاراعاندى وبلىسى پوليسيا دەپارتامەنتىنىڭ باستىعى نەگمەت يسماعۇلوۆ نۇرالى مەن ونىڭ اناسىن كەزدەسۋگە شاقىرعان.
«مەن نۇرالىنىڭ ەرلىگى تۋرالى الەۋمەتتىك جەلىلەردەن ءبىلدىم جانە ونىڭ باتىلدىعىنا شىن جۇرەكتەن ءتانتى بولدىم. سىن ساعاتتا ول ابدىراپ قالماي، ءوز ءومىرىن قاتەرگە تىگىپ، كىشكەنتاي بالانىڭ ءومىرىن ساقتاپ قالدى. مۇنداي ارەكەت قۇرمەتكە لايىق»، — دەدى يسماعۇلوۆ.
ءجاسوسپىرىمنىڭ اناسى سامال ءابدىراحمانوۆا الدىمەن ۇلى ءۇشىن قورىققانىن، ءبىراق بالانىڭ قۇتقارىلعانىن بىلگەن سوڭ ماقتانىش سەزىمدە بولعانىن ايتتى.
نۇرالىنىڭ ءوزى وقيعا كەزىندە ماراپات تۋرالى ويلاماعانىن ايتتى.
«ءبارى كۇتپەگەن جەردەن بولدى. الدىمەن بالا ۇرلەمەلى ماتراستا ءجۇزىپ ءجۇردى، سودان كەيىن جەلدىڭ سالدارىنان ماتراس اۋدارىلىپ، ول سۋعا ءتۇستى. مەن دەرەۋ ونى قۇتقارۋعا ۇمتىلدىم. مەنىڭ بەس باۋىرىم بار، سوندىقتان سول ساتتە ونىڭ ورنىنا ءوز تۋىستارىمدى ەلەستەتتىم. مەن جاي عانا بالانىڭ ءتىرى قالعانىن قالادىم»، — دەدى ءجاسوسپىرىم.
كورسەتكەن باتىلدىعى مەن ەرىك-جىگەرى ءۇشىن نۇرالىعا ءىىم سيمۆوليكاسى بار قول ساعاتى تابىستالدى. ونىڭ اناسى العىس حات الدى، ال ءجاسوسپىرىمنىڭ باۋىرلارىنا سىيلىقتار بەرىلدى.
بۇعان دەيىن «كۋرسيۆ» اباي وبلىسىندا دزيۋدودان جاتتىقتىرۋشى تيمۋر راحيمجانوۆ اعىسقا ىلەسىپ كەتكەن جەتى جاسار بالانى ەرتىس وزەنىنەن قۇتقارعانىن جازعان. ەر ادام ءجۇزىپ بارىپ، بالانى جاعاعا شىعارعان. بۇل ارەكەتى ءۇشىن ول تجم العىس حاتىمەن ماراپاتتالعان.