2026 جىلدىڭ باسىنان بەرى قازاقستاندا ادام ساۋداسىنىڭ 85 فاكتىسى توقتاتىلىپ، زاڭسىز كوشى-قوننىڭ توعىز ارناسى جويىلدى. بۇل تۋرالى استانادا وتكەن تۇركى مەملەكەتتەرى ۇيىمىنا مۇشە ەلدەردىڭ ىشكى ىستەر مينيسترلەرىنىڭ كەزدەسۋى قورىتىندىسى بويىنشا ىشكى ىستەر مينيسترلىگى حابارلادى، دەپ جازادى infohub.kz سايتى.
كەزدەسۋدىڭ جەكەلەگەن باعىتتارىنىڭ ءبىرى ادام ساۋداسى مەن زاڭسىز كوشى-قونعا قارسى ءىس-قيمىل بولدى. ىىم-دە بۇل جۇمىستىڭ تەك وسىنداي قىلمىستاردى اشۋعا عانا ەمەس، سونىمەن قاتار پروفيلاكتيكا مەن زارداپ شەككەندەردى قورعاۋعا باعىتتالعانىن اتاپ ءوتتى.
بۇۇ-نىڭ حالىقارالىق كوشى-قون ۇيىمىمەن بىرلەسىپ، قازاقستاندا ادام ساۋداسىنىڭ قۇرباندارىن انىقتاۋ جونىندەگى ءىس-قيمىل الگوريتمى ازىرلەنىپ، بەكىتىلدى.
ىشكى ىستەر ءمينيسترى ەرجان سادەنوۆ قىلمىستىق توپتار زاڭسىز ميگرانتتاردى زاڭداستىرۋ ءۇشىن ءتۇرلى سحەمالاردى پايدالانىپ جاتقانىن مالىمدەدى.
«قىلمىستىق توپتار ميگرانتتاردى زاڭداستىرۋدىڭ ءتۇرلى سحەمالارىن قولدانادى — جالعان جۇمىسقا ورنالاستىرۋ، تۇرعىلىقتى جەرى بويىنشا تىركەۋ، جالعان شاقىرۋلار. مۇنداي سحەمالار كوبىنەسە ءبىر ەلدىڭ شەگىنەن شىعىپ كەتەدى، سوندىقتان ولارعا بىرلەسىپ قارسى تۇرۋ قاجەت»، — دەدى سادەنوۆ.
قازاقستان تمۇ ەلدەرىنە زاڭسىز كوشى-قون ارنالارى، ولاردىڭ ۇيىمداستىرۋشىلارى مەن تاسىمالداۋشىلارى، سونداي-اق ادام ساۋداسىنىڭ قۇرباندارى تۋرالى جەدەل اقپاراتپەن تۇراقتى الماسۋدى جولعا قويۋدى ۇسىندى.
جەكە ۇسىنىس ەڭبەك كوشى-قونىنا قاتىستى. ءىىم باسشىسى ەڭبەك ميگرانتتارى اراسىندا قاناۋ بەلگىلەرىن انىقتاۋعا كوبىرەك كوڭىل بولۋگە جانە وسى باعىتتا بىرلەسكەن ءىس-شارالار وتكىزۋگە شاقىردى.
«ءبىزدىڭ ورتاق مىندەتىمىز — جەكەلەگەن فاكتىلەردى توقتاتۋ عانا ەمەس، بۇكىل تىزبەكتى انىقتاۋ: ۇيىمداستىرۋشىلار مەن دەلدالداردان باستاپ ادامداردى تىكەلەي قاناۋمەن اينالىساتىندارعا دەيىن. ەڭ باستىسى — قۇربانداردىڭ وزدەرىن ۋاقىتىندا انىقتاپ، قورعاۋ»، — دەپ اتاپ ءوتتى مينيستر.
بۇعان دەيىن «كۋرسيۆ» تمۇ ەلدەرىنىڭ ىشكى ىستەر مينيسترلەرىمەن كەزدەسۋدە پرەزيدەنت قاسىم-جومارت توقايەۆ قۇقىق قورعاۋ سالاسىن ودان ءارى رەفورمالاۋ جانە تۇركى مەملەكەتتەرىنىڭ قاۋىپسىزدىك سالاسىنداعى ىنتىماقتاستىعىن كۇشەيتۋ تۋرالى مالىمدەگەنىن جازعان. ول سونداي-اق قاۋىپسىزدىك كەڭەسىنىڭ اپپاراتىن قۇرۋ جانە حالىق كەڭەسىنىڭ قۇرىلاتىنى تۋرالى حابارلاعان.