2026 جىلدىڭ باسىندا قازاقستاندا 14 پەن 34 جاس ارالىعىنداعى 5،89 ميلليون ادام تۇردى، بۇل ەل حالقىنىڭ 28،7 پايىزىن قۇرايدى. ءبىر جىل ىشىندە جاس قازاقستاندىقتاردىڭ سانى 69،4 مىڭعا ءوستى، الايدا ءوسىم تەك قالالىق جەرلەردە بايقالدى، دەپ حابارلايدى infohub.kz سايتى.
قالالىق جاستاردىڭ سانى ءبىر جىلدا 91،4 مىڭ ادامعا نەمەسە 2،5 پايىزعا ءوسىپ، 3،76 ميلليونعا جەتتى. ال اۋىلدىق جەرلەردە كەرىسىنشە، جاستار سانى 22 مىڭعا ازايىپ، 2،13 ميلليوندى قۇرادى.
ابسوليۋتتىك كورسەتكىش بويىنشا ەڭ كوپ جاستار الماتىدا تۇرادى — 729،2 مىڭ. ەكىنشى ورىندا تۇركىستان وبلىسى — 675،6 مىڭ، ءۇشىنشى ورىندا استانا — 516 مىڭ. ودان كەيىن الماتى وبلىسى (447،2 مىڭ)، شىمكەنت (409،2 مىڭ) جانە جامبىل وبلىسى (357،1 مىڭ) تۇر.
جاستاردىڭ جالپى حالىق سانىنداعى ۇلەسىن قاراستىرساق، شىمكەنت كوش باستاپ تۇر، مۇندا تۇرعىنداردىڭ 31،6 پايىزى 14-34 جاس ارالىعىندا. استانادا بۇل كورسەتكىش 31،5 پايىزدى، تۇركىستان وبلىسىندا 31،4 پايىزدى، الماتىدا 31،1 پايىزدى قۇرايدى.
جاستار ۇلەسى ەڭ تومەن شىعىس قازاقستان وبلىسىندا — 23،4 پايىز. سولتۇستىك قازاقستان وبلىسىندا بۇل كورسەتكىش 24،4 پايىزعا، اباي وبلىسىندا 24،8 پايىزعا تەڭ.
جاس تۇرعىندار سانىنىڭ ەڭ جوعارى ءوسۋ قارقىنى استانادا بايقالادى: ءبىر جىلدا ولار 7،1 پايىزعا ارتتى. شىمكەنتتە ءوسىم 3 پايىزدى، الماتى وبلىسىندا 2،5 پايىزدى، الماتىدا 2،4 پايىزدى، ماڭعىستاۋ وبلىسىندا 1،9 پايىزدى قۇرادى.
سونىمەن قاتار، كەيبىر وڭىرلەر جاستارىنان ايىرىلىپ جاتىر. ەڭ ۇلكەن قىسقارۋ سولتۇستىك قازاقستان وبلىسىندا — 2،3 پايىزعا. اباي وبلىسىندا تومەندەۋ 1،5 پايىزدى، شىعىس قازاقستاندا 1،4 پايىزدى، قوستاناي وبلىسىندا 1،3 پايىزدى قۇرادى.
جاس قازاقستاندىقتاردىڭ جوعارى ۇلەسى تۇرعىن ۇيگە سۇرانىسقا اسەر ەتەدى. Energyprom دەرەكتەرىنە سايكەس، وتباسى بانكى ارقىلى 35 جاسقا دەيىنگى 283،4 مىڭ ادام مەنشىكتى تۇرعىن ءۇي ساتىپ الدى، بۇل بانكتەگى بارلىق قارىز الۋشىلاردىڭ 42،5 پايىزىن قۇرايدى. سوڭعى ەكى جارىم جىلدا شامامەن 71 مىڭ جاس قازاقستاندىق تۇرعىن ءۇي الدى.
تاعى 12 480 جاس وتباسى 2017 جىلدان بەرى جۇمىس ىستەپ كەلە جاتقان وڭىرلىك جاستار باعدارلامالارى ارقىلى تۇرعىن ۇيمەن قامتاماسىز ەتىلدى. تەك 2025 جىلى ولار بويىنشا 3 605 نەسيە بەرىلدى.
ەڭ ءىرى باعدارلامالاردىڭ ءبىرى الماتىدا جۇزەگە اسىرىلۋدا. «الماتى جاستارى» باعدارلاماسى جۇمىس ىستەگەن كەزەڭدە 8 326 ادام تۇرعىن ءۇي ساتىپ الدى. العاشقى جىلى نەسيە العاندار سانى نەبارى 100 بولسا، 2025 جىلى — 2 276 ادامعا جەتتى.
وڭىرلىك باعدارلامالار بويىنشا باستاپقى جارنا 10 پايىزدان باستالادى، مولشەرلەمە — جىلدىق 5 پايىزدان، گەسۆ — 5،2 پايىزدان 5،7 پايىزعا دەيىن. قاتىسۋشىلار پاتەرلەردى العاشقى جانە قايتالاما نارىقتان ساتىپ الا الادى.
قازاقستاندا جاستارعا 14 پەن 34 جاس ارالىعىنداعى ازاماتتار جاتادى. جاس شەگىن 2022 جىلى كەڭەيتكەن بولاتىن.