قازاقستاندا ءۇي يتتەرى مەن مىسىقتارىن مىندەتتى تۇردە چيپتەۋ ەنگىزىلۋدە. ق ر ەكولوگيا جانە تابيعي رەسۋرستار مينيسترلىگىنىڭ ءتيىستى بۇيرىعى جاريالاندى، ال 2026 جىلدىڭ 28 تامىزىنان باستاپ وسى جانۋارلاردىڭ يەلەرى ءۇي جانۋارلارىن سايكەستەندىرۋ ءۇشىن ەلەكتروندى چيپتەردى قولدانۋعا مىندەتتى بولادى. جاڭا ەرەجەلەردى بۇزعانى ءۇشىن جەكە تۇلعالارعا 86 500 تەڭگەگە دەيىن ايىپپۇل قاراستىرىلعان، دەپ حابارلايدى infohub.kz سايتى.
قولدانىستاعى ءۇي جانۋارلارىن ەسەپكە الۋ ەرەجەلەرىنە سايكەس، يەلەرى كەز كەلگەن سايكەستەندىرۋ ءادىسىن تاڭداي الاتىن: جاعا، بىلەزىك، تاتۋيروۆكا، ەلەكتروندى تاڭبا نەمەسە چيپ. الايدا ەندى يتتەر مەن مىسىقتار ءۇشىن بۇل ءتىزىم ءبىر مىندەتتى نۇسقاعا — ميكروچيپكە قىسقارادى. ەسەپكە الۋعا جاتاتىن جانۋارلاردىڭ باسقا تۇرلەرى ءۇشىن تاڭداۋ مۇمكىندىگى ساقتالادى.
چيپ ءنومىرى ءبىرىڭعاي دەرەكقورعا ەنگىزىلەدى، بۇل ءۇي جانۋارلارىنىڭ پوپۋلياسياسىن ءتيىمدى باقىلاۋعا جانە ولاردىڭ يەلەرىنىڭ جاۋاپكەرشىلىگىن ارتتىرۋعا مۇمكىندىك بەرەدى. ەكولوگيا مينيسترلىگىندە بۇل جاڭاشىلدىق حالىقتىڭ قاۋىپسىزدىگىن ارتتىرۋعا، جانۋارلاردىڭ ادامدارعا شابۋىل جاساۋ جاعدايلارىن ازايتۋعا جانە قاڭعىباس جانۋارلاردى باقىلاۋدى جاقسارتۋعا باعىتتالعانىن اتاپ ءوتتى.
ءچيپتىڭ بولماۋى ق ر اقبتك بويىنشا اكىمشىلىك جاۋاپكەرشىلىككە اكەپ سوعادى. جەكە تۇلعالار ءۇشىن ايىپپۇل 20 اەك (2026 جىلى 86 500 تەڭگە)، لاۋازىمدى تۇلعالار ءۇشىن — 30 اەك (129 750 تەڭگە)، زاڭدى تۇلعالار ءۇشىن — 40 اەك (173 000 تەڭگە) قۇرايدى. جىل ىشىندە قايتالانعان بۇزۋشىلىق كەزىندە سومالار ارتادى: جەكە تۇلعالار ءۇشىن — 30 اەك، لاۋازىمدى تۇلعالار ءۇشىن — 40 اەك، زاڭدى تۇلعالار ءۇشىن — 50 اەك (216 250 تەڭگە).
ەسكە سالايىق، قازاقستاندا eGov Mobile قوسىمشاسىندا ءۇي جانۋارىنىڭ سيفرلىق پاسپورتى ءقازىردىڭ وزىندە جۇمىس ىستەيدى، وندا چيپتەۋ، ستەريليزاسيا جانە ۆاكسيناسيا تۋرالى دەرەكتەر ساقتالادى. ونى بەلسەندىرۋ ءۇشىن جانۋاردى ءبىرىڭعاي دەرەكقورعا (TABAN) تىركەۋ قاجەت. بۇعان دەيىن يەلەرى باس تارتقىسى كەلەتىن جانۋارلارعا جاڭا يەلەر ىزدەۋگە مىندەتتەلۋى مۇمكىن ەكەندىگى دە حابارلانعان بولاتىن.