قازاقستان دەنساۋلىق ساقتاۋ مينيسترلىگى زياندى تاعامداردىڭ جارناماسىنا قارسى كۇرەس بويىنشا جاڭا نورمالار ازىرلەدى. ۇسىنىلىپ وتىرعان تۇزەتۋلەر تەلەديدار، راديو، سىرتقى جارناما جانە الەۋمەتتىك جەلىلەردى قامتيدى، وندا جاسوسپىرىمدەر بلوگەرلەردىڭ ماركەتينگىنە ەرەكشە بەيىم، دەپ حابارلايدى infohub.kz.
اتاپ ايتقاندا، شەكتەۋلەر فاستفۋد، ءتاتتى سۋسىندار جانە قۇرامىندا قانت، تۇز بەن مامىر كوپ بولاتىن ونىمدەردىڭ جارناماسىنا قاتىستى بولادى.
زاڭ شىعارۋشىلاردىڭ ماقساتى – جاس ۇرپاقتىڭ تاماقتانۋ تاڭداۋىنا اسەردى ازايتۋ جانە بالالاردا ەرتە جاستان سالاۋاتتى تاماقتانۋ داعدىلارىن قالىپتاستىرۋ.
الايدا سالاۋاتتى ادەتتەردى ەنگىزۋدىڭ ناقتى تەتىكتەرى مەن جاڭا نورمالاردىڭ ەگجەي-تەگجەيى ازىرگە جاريالانباي وتىر. بارلىق جاڭاشىلدىقتار حالىقارالىق ستاندارتتار مەن دۇنيەجۇزىلىك دەنساۋلىق ساقتاۋ ۇيىمىنىڭ (ددۇ) ۇسىنىمدارىن ەسكەرە وتىرىپ ازىرلەنگەنى بەلگىلى.
زەرتتەۋ دەرەكتەرى بويىنشا، 6-9 جاس ارالىعىنداعى بالالاردىڭ شامامەن 23%-ى ارتىق سالماققا يە، ال 6%-ى سەمىزدىكتەن زارداپ شەگەدى. جاسوسپىرىمدەردىڭ 17،5%-دان استامى اپتا سايىن ەنەرگەتيكالىق سۋسىنداردى تۇتىنادى.
ەسكە سالايىق، بۇعان دەيىن قازاقستان پرەزيدەنتى قاسىم-جومارت توقايەۆ ۇكىمەتكە فاستفۋدتىڭ اگرەسسيۆتى جارناماسى ماسەلەسىن شەشۋدى تاپسىرعان بولاتىن. ول زياندى ادەتتەر جاستاردىڭ دەنساۋلىعىنا كەرى اسەر ەتىپ، دەنساۋلىق ساقتاۋ جۇيەسىنە جۇكتەمەنى ارتتىراتىنىن اتاپ ءوتتى.
ايتا كەتۋ كەرەك، رەسپۋبليكادا 21 جاسقا تولماعاندارعا ەنەرگەتيكالىق سۋسىنداردى ساتۋعا تىيىم سالۋ الدەقاشان قولدانىستا. سونىمەن قاتار، ءبىر جىلدان بەرى مەكتەپتەردە تۇز مولشەرىن ازايتۋدى جانە كوكونىستەر، جەمىستەر مەن ءسۇت ونىمدەرىنىڭ ۇلەسىن ارتتىرۋدى كوزدەيتىن جاڭا تاماقتاندىرۋ ستاندارتى قولدانىلۋدا.