جامبىل وبلىسىندا سوت اسكەردە قىزمەت ەتىپ جۇرگەن كەزدە تۇرعىلىقتى جەرى بويىنشا تىركەلمەگەنى ءۇشىن جاس جىگىتكە سالىنعان 15 مىڭ تەڭگە ايىپپۇلدى جويدى، دەپ حابارلايدى infohub.kz سايتى.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، تالاس اۋداندىق سوتى ازاماتتىڭ تۇرعىلىقتى جەرى بويىنشا تىركەۋ ەرەجەلەرىن بۇزعانى ءۇشىن اكىمشىلىك جاۋاپكەرشىلىككە تارتۋ تۋرالى قاۋلىعا شاعىمىن قارادى.
2026 جىلعى ماۋسىمدا قاراتاۋ قالاسىنداعى حالىققا قىزمەت كورسەتۋ ورتالىعىندا تەكسەرۋ كەزىندە جىگىتتىڭ تۇرعىلىقتى جەرى بويىنشا تىركەلمەگەنى انىقتالدى. وعان قاتىستى اكىمشىلىك قۇقىقبۇزۋشىلىق كودەكسىنىڭ 492-بابىنىڭ 2-بولىگى بويىنشا حاتتاما تولتىرىلىپ، 15 مىڭ تەڭگە ايىپپۇل سالىندى.
بۇل شەشىممەن كەلىسپەگەن جىگىت سوتقا جۇگىندى. ول 2025 جىلعى ماۋسىمنان باستاپ ۇلتتىق ۇلاندا اسكەري قىزمەت وتكەرگەنىن، ال 2026 جىلعى ماۋسىمدا قىزمەت مەرزىمىنىڭ اياقتالۋىنا بايلانىستى زاپاسقا شىعارىلعانىن ءتۇسىندىردى.
جىگىت اسكەري قىزمەت وتكەرۋ كەزىندە اكەسى ونى تۇرعىلىقتى جەرى بويىنشا ەسەپتەن شىعارعانىن، بۇل تۋرالى ول اسكەري قىزمەت اياقتالعاننان كەيىن عانا بىلگەنىن ايتتى.
ازاماتتىڭ اسكەري قىزمەت وتكەرگەنى سوتتا قۇجاتتارمەن راستالدى.
سوت لاۋازىمدى تۇلعانىڭ ادامدى جاۋاپكەرشىلىككە تارتۋ ماسەلەسىن دۇرىس شەشۋ ءۇشىن ماڭىزى بار بارلىق ءمان-جايلاردى ءتيىستى تۇردە زەرتتەمەگەنىن اتاپ ءوتتى. جىبەرىلگەن پروسەستىك بۇزۋشىلىقتار ءىستى جان-جاقتى، تولىق جانە وبەكتيۆتى قاراۋعا كەدەرگى كەلتىردى.
وسىعان بايلانىستى سوت شاعىمدى قاناعاتتاندىرىپ، ايىپپۇلدى جويىپ، ءىس بويىنشا ءىس جۇرگىزۋدى توقتاتتى.
قاۋلى زاڭدى كۇشىنە ەندى.