جامبىل وبلىسىندا ءبىر ايەل ءۇيىن 18 ملن تەڭگەگە ساتقانىمەن، نەبارى 14 ملن تەڭگە العان. ول كوشىرۋ تۋرالى تالاپپەن سوتقا جۇگىنۋگە ءماجبۇر بولعان. اقىر سوڭىندا تاراپتار كەلىسىمگە كەلدى، دەپ حابارلايدى infohub.kz.
جامبىل وبلىسى سوتتارىنىڭ رەسمي Telegram-ارناسىندا حابارلانعانداي، قورداي اۋداندىق سوتى قورداي اۋىلىنداعى تۇرعىن ۇيدەن كوشىرۋ جانە ونى بوساتۋ تۋرالى داۋ بويىنشا تاراپتاردى تاتۋلاستىردى. 2025 جىلدىڭ تامىزىندا تاراپتار 18 ملن تەڭگە تۇراتىن ءۇي مەن جەر تەلىمىن ساتىپ-ساتۋ شارتىن جاساسقان. جاۋاپكەر 14 ملن تەڭگە تولەگەن، الايدا قالعان 4 ملن تەڭگەنى بەلگىلەنگەن مەرزىمدە تولەمەگەن. وسىعان قاراماستان، جاۋاپكەر ۇيدە تۇرۋدى جالعاستىرعان. ءۇيدى ءوز ەركىمەن بوساتۋ تۋرالى بىرنەشە رەت تالاپ قويىلعانىمەن، ناتيجە بولماعان، تالاپكەر سوتقا جۇگىنۋگە ءماجبۇر بولعان.
تاتۋلاستىرۋ راسىمدەرىن قولدانۋ بارىسىندا سوت تاراپتارعا تاتۋلاسۋدىڭ ءتارتىبى مەن سالدارىن ءتۇسىندىردى. ناتيجەسىندە تاراپتار ءوزارا كەلىسىمگە كەلىپ، مەدياتيۆتىك كەلىسىم جاساستى. ونىڭ شارتتارىنا سايكەس، تالاپكەر جاۋاپكەر قاجەتتى سومانى تولەگەندىكتەن تالاپ قويۋدان باس تارتتى. جاۋاپكەر تالاپكەرگە 400 مىڭ تەڭگە وكىلدىك شىعىندى 4 اي بويى اي سايىن 100 مىڭ تەڭگەدەن تولەۋگە مىندەتتەندى. مەدياتيۆتىك كەلىسىمدى بەكىتۋگە بايلانىستى سوت ءىس بويىنشا ءىس جۇرگىزۋدى توقتاتتى. تالاپكەرگە بيۋدجەتتەن تولەنگەن مەملەكەتتىك باج قايتارىلدى. ۇيعارىم زاڭدى كۇشىنە ەنگەن جوق.