قازاقستان ازاماتى، ءىرى الاياقتىققا كۇدىكتى، رەسەي فەدەراسياسىنان ەكستراديسيالاندى، دەپ حابارلايدى infohub.kz سايتى.
قازاقستان رەسپۋبليكاسى باس پروكۋراتۋراسىنىڭ مالىمەتىنشە، ەر ادام اسا ءىرى كولەمدەگى الاياقتىق جاسادى دەپ ايىپتالۋدا. تەرگەۋ انىقتاعانداي، 2019 جىلدىڭ اقپان ايىندا ول ءۇش ازاماتتى الداپ، اقمولا وبلىسىنداعى كەن ورنىندا التىن قۇرامدى كەن وندىرۋگە كەلىسىمشارت جاساسۋعا جاردەمدەسەتىنىن ۋادە ەتكەن. قىزمەتى ءۇشىن ول ولاردان 500 مىڭ اقش دوللارىن العان.
سونىمەن قاتار، 2021 جىلى كۇدىكتى ەكى كاسىپكەردى جول-قۇرىلىس جۇمىستارىن ورىنداۋعا «قازاۆتوجول» ۇك» اق-مەن كەلىسىمشارت جاساسۋعا كومەكتەسەتىنىنە سەندىرىپ، ولاردان 93،4 ميلليون تەڭگە العان.
قىلمىس جاساعاننان كەيىن ەر ادام جاسىرىنىپ، حالىقارالىق ىزدەۋ جاريالانعان. وتكەن جىلدىڭ قىركۇيەك ايىندا ول ماسكەۋدە ۇستالىپ، قازاقستان باس پروكۋراتۋراسىنىڭ سۇراۋى بويىنشا وتانعا ەكستراديسيالاندى.
قازىرگى ۋاقىتتا كۇدىكتى تەرگەۋ يزولياتورىندا وتىر. وعان تاعىلعان ايىپتار بويىنشا م ۇلىكتى تاركىلەۋ جانە بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋعا ءومىر بويىنا تىيىم سالۋمەن قاتار 5 جىلدان 10 جىلعا دەيىن باس بوستاندىعىنان ايىرۋ جازاسى قاراستىرىلعان.