كوكشەتاۋدا كيبەرپوليسەيلەر جالعا بەرىلەتىن باسپاناعا قاتىستى ينتەرنەت-الاياقتىق فاكتىسىن اشتى. كۇدىكتى قالادان مىڭ شاقىرىم جەردە — ورالدا بولعان، دەپ حابارلايدى infohub.kz سايتى.
پوليسەيلەردىڭ انىقتاۋىنشا، ورال تۇرعىنى ينتەرنەتتە كوكشەتاۋداعى پاتەردى جالعا بەرەتىنى تۋرالى حابارلاندىرۋ ورنالاستىرعان. پوتەنسيالدى كليەنتتەردى تارتۋ ءۇشىن ول باسقا ادامداردىڭ پاتەرىنىڭ فوتوسۋرەتتەرىن پايدالانىپ، جالداۋ اقىسىن نارىقتىق باعادان تومەن كورسەتكەن.
حابارلاندىرۋ كوكشەتاۋ تۇرعىنىن قىزىقتىرعان. اقپاراتتىڭ دۇرىستىعىن تەكسەرمەي، پاتەردىڭ بار ەكەنىنە كوز جەتكىزبەي، ەر ادام «جالعا بەرۋشىمەن» بايلانىسقان. حات الماسۋ بارىسىندا الاياق ونى الدىن الا تولەم رەتىندە اقشا اۋدارۋعا كوندىرگەن. جابىرلەنۋشى 30 مىڭ تەڭگە اۋدارعان.
اقشانى العاننان كەيىن «پاتەر يەسىمەن» بايلانىس ۇزىلگەن. الدانىپ قالعانىن تۇسىنگەن ەر ادام پوليسياعا جۇگىنگەن.
جەدەل-ىزدەستىرۋ ءىس-شارالارىنىڭ ناتيجەسىندە كيبەرقىلمىسقا قارسى كۇرەس باسقارماسىنىڭ قىزمەتكەرلەرى كۇدىكتىنىڭ جەكە باسىن انىقتاعان. ول ورال تۇرعىنى بولىپ شىققان. تەرگەۋ امالدارى كەزىندە ودان ۇيالى تەلەفون تاركىلەنىپ، ءىس ماتەريالدارىنا زاتتاي دالەل رەتىندە قوسىلعان.
ءقازىر پوليسەيلەر ونى باسقا دا وسىعان ۇقساس قىلمىستارعا قاتىسى بار-جوعىن تەكسەرەدى.