كوكشەتاۋدا 72 جاستاعى زەينەتكەر اسا ءىرى مولشەردە پسيحوتروپتىق زاتتى ساتىپ الۋ، تاسىمالداۋ جانە ساقتاۋ ءۇشىن ناقتى باس بوستاندىعىنان ايىرۋ جازاسىنا كەسىلدى. ءسوز 300 ترامادول تابلەتكاسى تۋرالى بولىپ وتىر، ول جالعان رەسەپت ارقىلى الىنعان، دەپ حابارلايدى infohub.kz سايتى.
NUR.KZ اگەنتتىگى اقمولا وبلىسى پوليسيا دەپارتامەنتىنە سىلتەمە جاساپ حابارلاۋىنشا، ۇكىمدى كوكشەتاۋ قالالىق سوتى ماكينسك تۇرعىنىنا قاتىستى شىعارعان. ول اسا ءىرى مولشەردە پسيحوتروپتىق زاتتى زاڭسىز ساتىپ الۋ، تاسىمالداۋ جانە ساقتاۋ بويىنشا كىنالى دەپ تانىلدى.
تەرگەۋ بارىسىندا 2025 جىلدىڭ قىركۇيەگىندە زەينەتكەر جالعان رەسەپتتەردى پايدالانىپ، كوكشەتاۋداعى ءبىر ءدارىحانادان 30 قاپتاما ترامادول ساتىپ العانى انىقتالدى. ءار قاپتامادا 10 تابلەتكادان بولعان، بارلىعى 300 تابلەتكا پسيحوتروپتىق زات.
تىيىم سالىنعان پرەپاراتتى ساتىپ العان سوڭ ايەل ونى تاسىمالداپ، ساقتاعان. كەيىن ول ەسىرتكى قىلمىسىنا قارسى ءىس-قيمىل بولىمشەسىنىڭ قىزمەتكەرلەرىمەن ۇستالدى. جيىنتىق كەستەگە سايكەس، تاركىلەنگەن زاتتىڭ ماسساسى اسا ءىرى مولشەرگە جاتادى.
سوت وتىرىسىندا سوتتالۋشى تابلەتكالاردى جەكە ءوزى پايدالانۋ ءۇشىن ساتىپ العانىن ءتۇسىندىردى. الايدا سوتقا دەيىنگى تەرگەۋ بارىسىندا جينالعان دالەلدەر ونىڭ پسيحوتروپتىق زاتتى زاڭسىز ساتىپ الۋ، تاسىمالداۋ جانە ساقتاۋ بويىنشا كىناسىن تولىق راستادى.
جازا تاعايىنداۋ كەزىندە سوت جاسالعان قىلمىستىڭ سيپاتى مەن قوعامدىق قاۋىپتىلىك دارەجەسىن، سونداي-اق سوتتالۋشىنىڭ جاسىن ەسكەردى. جاۋاپكەرشىلىكتى جەڭىلدەتەتىن نەمەسە اۋىرلاتاتىن ءمان-جايلاردى سوت انىقتاعان جوق.
باستاپقىدا سوت ايەلگە 3 جىل 6 اي باس بوستاندىعىنان ايىرۋ جازاسىن تاعايىندادى. الايدا امنيستياعا بايلانىستى جازا مەرزىمى قىسقارتىلىپ، تۇپكىلىكتى 2 جىل 4 اي باس بوستاندىعىنان ايىرۋ بولىپ بەلگىلەندى. جازانى ورتاشا قاۋىپسىزدىكتەگى قىلمىستىق-اتقارۋ جۇيەسى مەكەمەسىندە وتەيدى.
اقمولا وبلىسى پوليسيا دەپارتامەنتى 2023 جىلدان باستاپ ترامادول قازاقستاندا اينالىمى باقىلاۋعا جاتاتىن ەسىرتكى قۇرالدارى، پسيحوتروپتىق زاتتار جانە ولاردىڭ انالوگتارى تىزىمىنە ەنگىزىلگەنىن قوستى. وسى پرەپاراتتى زاڭسىز ساتىپ الۋ، ساقتاۋ، تاسىمالداۋ جانە وتكىزۋ قىلمىستىق جاۋاپكەرشىلىككە اكەپ سوعادى.
ەسكە سالايىق، بىلتىر كۇزدە اقمولالىق پوليسەيلەر 71 جاستاعى زەينەتكەردى ۇستاعانىن حابارلاعان بولاتىن. ودان ءىرى مولشەردە ترامادول تابىلىپ، تاركىلەنگەن. ايەل پرەپاراتقا جۇبايىنىڭ سىنىقتان كەيىنگى جانە ونكولوگيالىق اۋرۋىنان سوڭ اۋەستەنگەنىن مويىنداعان.