قوستاناي وبلىسىنىڭ تۇرعىنى ينۆەستيسيادان جوعارى تابىس ۋادەسىنە سەنىپ، ينتەرنەت-الاياقتاردىڭ قۇربانى بولا جازدادى. ەر ادام الاياقتارعا ميلليون تەڭگەدەن استام اقشا اۋدارىپ، «ينۆەستيسيانى» جالعاستىرۋ ءۇشىن كولىگىن كەپىلگە قويۋعا بەل بۋعان. الايدا تانىسى ۋاقىتىندا الداۋدى بايقاپ، پوليسياعا حابارلاعان، دەپ حابارلايدى infohub.kz.
وقيعا قوستاناي وبلىسىندا بولعان. «102» ارناسىنا ينتەرنەت-الاياقتىقتىڭ ىقتيمال فاكتىسى تۋرالى حابارلاما تۇسكەن. انىقتالعانداي، جەرگىلىكتى تۇرعىن ينۆەستيسيادان جوعارى تابىس تابۋ ۇسىنىسىنا قىزىعىپ، جالعان ينۆەستيسيالىق پلاتفورماعا تىركەلىپ، بەلگىسىز تۇلعالارعا 1 ميلليون تەڭگەدەن استام اقشا اۋدارعان. ودان كەيىن جالعان قارجى كەڭەسشىلەرى كوميسسيا تولەۋ جانە پايدا الۋ قاجەتتىگىن العا تارتىپ، قوسىمشا اقشا اۋدارۋدى تالاپ ەتكەن.
قاجەتتى سومانى تابۋ ءۇشىن ەر ادام 1،4 ميلليون تەڭگەگە باعالانعان كولىگىن كەپىلگە قويۋدى شەشكەن. الايدا ونىڭ نيەتىن بىلگەن تانىسى الاياقتىقتان كۇدىكتەنىپ، دەرەۋ پوليسياعا حابارلاعان. قوستاناي وبلىسى پد كيبەرقىلمىسقا قارسى كۇرەس باسقارماسىنىڭ قىزمەتكەرلەرى وقيعا ورنىنا جەدەل جەتىپ، ەر ادامعا ينۆەستيسيالىق الاياقتىقتىڭ مەحانيزمىن ءتۇسىندىرىپ، ودان ءارى اقشا اۋدارۋدان باس تارتۋعا كوندىرگەن.
تانىسىنىڭ ساقتىعى مەن پوليسيانىڭ ۋاقتىلى ارەكەتىنىڭ ارقاسىندا 1،4 ميلليون تەڭگە كولەمىندەگى قوسىمشا قارجىلىق شىعىننىڭ الدىن الۋ مۇمكىن بولدى.