قوستانايدا سوت اسكەري قىزمەتكەردىڭ تۇرعىن ۇيمەن قامتاماسىز ەتىلۋ قۇقىعىن قورعادى. ول التى ادامنان تۇراتىن وتباسىنا ءبىر بولمەلى پاتەر ۇسىنىلعاندىقتان باس تارتقانى ءۇشىن ەسەپتەن شىعارىلعان بولاتىن، دەپ حابارلايدى infohub.kz سايتى.
قوستاناي وبلىسى سوتتارىنىڭ رەسمي Telegram-ارناسىندا حابارلانعانداي، مامانداندىرىلعان اۋدانارالىق اكىمشىلىك سوت ازاماتتىڭ تۇرعىن ۇيگە مۇقتاجدار ەسەبىنەن شىعارۋ تۋرالى حاتتامالىق شەشىمدى زاڭسىز دەپ تانۋ جانە كۇشىن جويۋ، سونداي-اق اعىمداعى تۇرعىن ءۇي تولەمدەرىن تاعايىنداماۋ تۋرالى تالاپ ارىزى بويىنشا ءىستى قارادى.
تالاپ قويۋشىنىڭ تالاپتارى تۇرعىن ءۇي كوميسسياسى وتىرىسىنىڭ كۇن تارتىبىندە قىزمەتتىك تۇرعىن ءۇيدى (ءبىر بولمەلى پاتەردى) ءبولۋ ماسەلەسى قارالۋعا ءتيىس بولعانىمەن نەگىزدەلگەن. تۇرعىن ءۇي كوميسسياسى اسكەري قىزمەتكەردى تۇرعىن ۇيگە مۇقتاجدار ەسەبىنەن شىعارىپ، وعان ۇسىنىلعان پاتەردىڭ اۋدانى ونىڭ وتباسى قۇرامىنا (6 ادام) سايكەس كەلمەگەندىكتەن باس تارتقانى ءۇشىن اعىمداعى تۇرعىن ءۇي تولەمدەرىن تاعايىنداۋدى توقتاتۋ تۋرالى شەشىم قابىلدادى.
جاۋاپكەر تاراپىنىڭ قىزمەتتىك تۇرعىن ءۇي بەرۋ تۋرالى زاڭنىڭ 101-1-بابى 1-تارماعىنىڭ 4-بولىگىنىڭ ارىپتىك مازمۇنىنا سىلتەمە جاساعان دالەلىن سوت نازارعا المادى، ويتكەنى ق ر «تۇرعىن ءۇي قاتىناستارى تۋرالى» زاڭىنىڭ 75-بابىندا مەملەكەتتىك تۇرعىن ءۇي قورىنان تۇرعىن ءۇيدى تۇرعىن ءۇي-جايىنىڭ اۋدانى نورمالارىن ساقتاي وتىرىپ بەرۋ تالابى بەلگىلەنگەن.
سونىمەن قاتار، داۋلى حاتتامادا تۇرعىن ءۇيدى ءبولۋ ءبىر ادامنان تۇراتىن وتباسى قۇرامىنىڭ اۋدانىنا سايكەس كورسەتىلگەن. التى ادامنان تۇراتىن وتباسى بار تالاپ قويۋشىعا ءبىر بولمەلى پاتەر بەرۋ تۇرعىن ۇيمەن قامتاماسىز ەتۋ ماقساتىنا انىق سايكەس كەلمەيدى، پروپورسيونالدىلىق تالاپتارىن بۇزادى جانە اسكەري قىزمەتكەر مەن ونىڭ وتباسى مۇشەلەرىنىڭ لايىقتى تۇرعىن ءۇي جاعدايلارىنا قۇقىعىن ىسكە اسىرۋدى قامتاماسىز ەتپەيدى.
سونىمەن قاتار، تالاپ قويۋشىعا قىزمەتتىك تۇرعىن ءۇيدىڭ كەزەكتىلىك ساقتالا وتىرىپ ۇسىنىلعانى تۋرالى دالەلدەمەلەر ۇسىنىلمادى. تالاپ قويۋشىدان بۇرىن كەزەكتە تۇرعان ادامدارعا پاتەر ۇسىنىلماعان.
جيناقتالعان دالەلدەمەلەردىڭ جيىنتىعىن ەسكەرە وتىرىپ، سوت اسكەري قىزمەتكەردىڭ تالابىن قاناعاتتاندىرىپ، ونىڭ تۇرعىن ۇيمەن قامتاماسىز ەتىلۋ قۇقىعىن قالپىنا كەلتىردى. شەشىم زاڭدى كۇشىنە ەندى.