قازاقستان رەسپۋبليكاسى ىشكى ىستەر مينيسترلىگى ازاماتتارعا الاياقتىقتىڭ جاڭا ءتاسىلى تۋرالى ەسكەرتۋ جاسادى. بۇل جولى الاياقتار وزدەرىن باقسى-بالگەر، كورىپكەل رەتىندە تانىستىرىپ، ادامداردى الداپ ءجۇر، دەپ حابارلايدى infohub.kz سايتى.
ۆەدومستۆونىڭ مالىمەتىنشە، ينتەرنەتتە «ەمشى»، «كورىپكەل» نەمەسە «باقسى» دەپ تانىلاتىن الاياقتار ادامدارعا «بالاڭىزعا قاتتى كوز ءتيدى» دەپ، اقشاعا «ەمدەپ، كوز ءتيۋىن الىپ تاستاۋدى» ۇسىناتىن جاعدايلار جيىلەگەن.
ءىىم تۇسىندىرگەندەي، الاياقتار ادامداردىڭ جاقىندارى ءۇشىن قورقىنىشى مەن ۋايىمىن پايدالانادى. ولار الەۋمەتتىك جەلىلەر مەن مەسسەندجەرلەر ارقىلى قۇرباندارىمەن بايلانىسىپ، ءتۇرلى «بەلگىلەردى» سيپاتتاپ، جاعدايدىڭ اۋىرلىعىنا سەندىرەدى. سودان كەيىن «ەمدەۋ جۇرگىزۋ»، «كوز ءتيۋىن الۋ» نەمەسە «قاجەتتى زاتتاردى ساتىپ الۋ» سىلتاۋىمەن اقشا اۋدارۋدى سۇرايدى.
پوليسيا قازاقستاندىقتارعا ينتەرنەتتەگى بەيتانىس ادامداردىڭ «ەمدەيمىن»، «كوز ءتيۋىن الامىن» نەمەسە «سۇقتان ارىلتامىن» دەگەن ۋادەلەرىنە سەنبەۋگە، بەلگىسىز ادامداردىڭ شوتتارىنا اقشا اۋدارماۋعا، جەكە دەرەكتەرىن، بانك كارتالارىنىڭ دەرەكتەمەلەرىن جانە SMS-حابارلامالارداعى كودتاردى ەشكىمگە ايتپاۋعا، قورقىنىش پەن ۇرەيگە بەرىلمەۋگە، اقپاراتتى بىرنەشە دەرەككوزدەن تەكسەرۋگە، سونداي-اق حات-حابارلار مەن اۋدارىم تۇبىرتەكتەرىن ساقتاۋعا كەڭەس بەرەدى.
ءىىم الاياقتار ادامداردىڭ سەنىمىن، ولاردىڭ جاقىندارى ءۇشىن قورقىنىشى مەن ۋايىمىن پايدالاناتىنىن اتاپ ءوتتى. «كوز تيۋ»، «سۇق»، «سيقىر» جانە وسىعان ۇقساس تاقىرىپتاردى سىلتاۋ ەتىپ اقشا تالاپ ەتۋ — الداۋدىڭ ءبىر ءتاسىلى بولۋى مۇمكىن.