قىزىلوردادا ءبىر توپ جۇرگىزۋشى ينتەرنەتكە تاراعان بەينەجازبادان كەيىن جاۋاپكەرشىلىككە تارتىلدى. كادرلاردا اۆتوكولىك يەلەرى مانەۆر جاساۋ ەرەجەلەرىن جانە جول ءجۇرىسىنىڭ باسقا دا نورمالارىن بۇزعانى كورىنەدى، دەپ حابارلايدى infohub.kz سايتى.
Polisia.kzء-تىڭ حابارلاۋىنشا، بۇزۋشىلار پوليسيا قىزمەتكەرلەرىنىڭ الەۋمەتتىك جەلىلەردى باقىلاۋى بارىسىندا انىقتالعان. بەينەجازبادا بىرنەشە جۇرگىزۋشى قالا اۋماعىندا كورتەج ۇيىمداستىرعانى كورسەتىلگەن. ولار جول ءجۇرىسى ەرەجەلەرىن ەلەمەي، مانەۆر جاساۋ جانە اۆاريالىق سيگنالدى پايدالانۋ ءتارتىبىن بۇزعان، سونداي-اق مەملەكەتتىك تىركەۋ نومىرلەرىنسىز كولىك قۇرالدارىن باسقارعان.
ۆەدومستۆونىڭ مالىمەتىنشە، وقيعاعا قاتىسۋشىلاردىڭ بارلىعى انىقتالىپ، پوليسياعا جەتكىزىلگەن. ولار قىزىلوردا تۇرعىندارى، جاستارى 20 بەن 35 ارالىعىندا. قۇقىق بۇزۋشىلارعا قاتىستى قولدانىستاعى زاڭناما اياسىندا شارالار قابىلداندى. ءبىر كولىك ارنايى تۇراققا قويىلدى.
ىشكى ىستەر مينيسترلىگى پوليسيا الەۋمەتتىك جەلىلەردى باقىلاۋدى جالعاستىرىپ جاتقانىن جانە مۇنداي فاكتىلەردىڭ ەشقايسىسى نازاردان تىس قالمايتىنىن اتاپ ءوتتى. ءاربىر قۇقىق بۇزۋشىلىققا ءتيىستى قۇقىقتىق باعا بەرىلەدى. ۆەدومستۆو ازاماتتاردى جول ءجۇرىسى ەرەجەلەرىن قاتاڭ ساقتاۋعا شاقىرىپ، جولدىڭ ءجۇرۋ بولىگىن جابۋ، دىبىستىق سيگنالدى زاڭسىز پايدالانۋ نەمەسە ءقاۋىپتى مانەۆرلەر جاساۋ — بۇل زاڭعا قايشى ارەكەتتەر ەكەنىن جانە مىندەتتى تۇردە جاۋاپكەرشىلىككە اكەپ سوعاتىنىن ەسكەرتتى.