قوستاناي وبلىسىندا ءجاسوسپىرىمدى قورلاۋ ىسىنە قاتىستى داۋ-داماي ءورشىپ تۇر. قوستاناي پروكۋراتۋراسى سوت شەشىمىمەن كەلىسپەي، سوت اكتىسىن قايتا قاراۋدى تالاپ ەتۋدە، دەپ حابارلايدى infohub.kz.
وقيعا ليساكوۆسك قالاسىندا بولعان. ءجاسوسپىرىم قۇرداستارىنىڭ قورلاۋىنا ۇشىراپ، ولار ءوز ارەكەتتەرىن تەلەفونعا ءتۇسىرىپ العان. قورلاۋ ۆيدەوسى تارالىپ، قوعامدا كەڭ رەزونانس تۋدىرعان.
12 تامىزدا قوستاناي وبلىسىنىڭ كامەلەتكە تولماعاندار ىستەرى جونىندەگى مامانداندىرىلعان اۋدانارالىق سوتى ايىپتالۋشى جاسوسپىرىمدەردىڭ ءبىرىنىڭ اناسىنا قاتىستى اكىمشىلىك ءىستى قارادى. سوت ق ر اكىمشىلىك قۇقىق بۇزۋشىلىق تۋرالى كودەكسىنىڭ 127-بابى 3-بولىگى بويىنشا اكىمشىلىك قۇقىق بۇزۋشىلىق قۇرامىن تاپپاي، ءىس جۇرگىزۋدى توقتاتتى.
الايدا پروكۋرورلار بۇل شەشىمدى قاتە دەپ ساناپ، اپەللياسيالىق شاعىم بەردى. قاداعالاۋ ورگانىنىڭ حابارلاۋىنشا، 2026 جىلعى 25 تامىزدا قوستاناي پروكۋراتۋراسى قوستاناي وبلىستىق سوتىنا قابىلدانعان سوت اكتىسىن قايتا قاراۋ تۋرالى ءوتىنىشحات ەنگىزگەن. قازىرگى ۋاقىتتا ءوتىنىشحات اپەللياسيالىق ساتىداعى سوتتىڭ قاراۋىندا.
پروكۋراتۋرا ءىستىڭ ءمان-جايىنا تۇپكىلىكتى قۇقىقتىق باعا زاڭدا بەلگىلەنگەن تارتىپپەن سوت تاراپىنان بەرىلەتىنىن اتاپ ءوتتى. قوعام جانە زارداپ شەككەننىڭ اتا-اناسى ءادىل شەشىم كۇتۋدە.