الماتىداعى بالالار شۇعىل كومەك ورتالىعىندا ءبىر تۇنگى اۋىسىمدا حيرۋرگتەر ءۇش شۇعىل وپەراسيا جاساپ، كىشكەنتاي پاسيەنتتەردىڭ اسقازان-ىشەك جولىنان ماگنيتتىك شارلاردى الىپ تاستادى. بالالاردىڭ جاسى ەكىدەن تورتكە دەيىن، بارلىعىنا ىشەك تەسىلۋ ءقاۋپى تونگەن ەدى، دەپ حابارلايدى infohub.kz.
سول كۇنى العاشقى بولىپ ءىشى اۋىرىپ، ەكى جاسار ءسابي ءتۇستى. ۋلترادىبىستىق زەرتتەۋ كوپتەگەن بوگدە زاتتاردىڭ بار ەكەنىن كورسەتكەن سوڭ، دارىگەرلەر دەرەۋ وتا جاساۋعا شەشىم قابىلدادى. وپەراسيا بارىسىندا بالانىڭ دەنەسىنەن 25 ماگنيت الىندى.
بىرنەشە ساعاتتان كەيىن ورتالىققا ەكى جارىم جاسار تاعى ءبىر بالا جەتكىزىلدى. ونىڭ قۇسۋى مەن ءىشى اۋىرعان. شۇعىل وتا كەزىندە حيرۋرگتەر توعىز ماگنيتتى الىپ تاستادى.
سول اۋىسىمنىڭ تاڭىنا قاراي ءدال وسىنداي بەلگىلەرمەن ءتورت جاسار پاسيەنت كەلدى. الايدا ونىڭ ىشەگىندەگى ماگنيتتەر سانى الدەقايدا كوپ بولىپ، دارىگەرلەردى تاڭعالدىردى.
«بۇل شوك بولدى. ءبىز بالانىڭ جىڭىشكە ىشەگىنەن 59 ماگنيت الدىق. (...) بۇل اۋىسىمداعى ەڭ كۇردەلى وپەراسيا بولدى»، — دەدى حيرۋرگ ايبول سۇلتانبەكوۆ.
الماتى قالالىق دەنساۋلىق ساقتاۋ باسقارماسىنىڭ مالىمەتىنشە، جىل باسىنان بەرى ورتالىققا وسىنداي دياگنوزبەن 15 بالا تۇسكەن، ولاردىڭ بارلىعى ماگنيت جۇتقان. دارىگەرلەردىڭ ايتۋىنشا، ءقاۋىپ ماگنيتتەردىڭ دەنە ىشىندە بىر-بىرىنە تارتىلىپ، اۋىر زارداپتارعا اكەلۋىندە.
مەديكتەر قازاقستاندىقتاردى ماگنيتتىك شارلار مەن قۇرامىندا ماگنيتى بار باسقا دا ويىنشىقتاردى بالالاردىڭ قولى جەتپەيتىن جەردە ساقتاۋعا جانە بالانىڭ نەمەن وينايتىنىن مۇقيات قاداعالاۋعا شاقىرادى.
بۇعان دەيىن الماتىدا ءبىر بالا ءۇش ماگنيت جۇتىپ، وپەراسيا ۇستەلىنە تۇسكەنى حابارلانعان بولاتىن.