جەتىسۋ وبلىسىندا ءىرى قارا مالدى سەريالى ۇرلاۋ تۋرالى قىلمىستىق ءىستىڭ تەرگەۋى اياقتالدى. سارقان اۋدانىنىڭ التى تۇرعىنى مال ۇرلاۋ ايىبىمەن سوت الدىنا كەلدى، دەپ حابارلايدى infohub.kz سايتى.
ءىىم Polisia.kz مەدياپورتالىنىڭ مالىمەتىنشە، تەرگەۋ بارىسىندا قىلمىسكەرلەردىڭ الدىن الا ءسوز بايلاسىپ ارەكەت ەتكەنى انىقتالدى. ولار ۇرلانعان مالدى الاكول اۋدانىنىڭ اۋماعىنان سارقان اۋدانىنا ايداپ اكەلگەن، وندا مالدىڭ ءبىر بولىگىن سويىپ، ەتىن ساتپاق بولعان.
جەتىسۋ وبلىسى پروكۋراتۋراسىمەن بىرلەسىپ جۇرگىزىلگەن جەدەل-تەرگەۋ ءىس-شارالارىنىڭ ناتيجەسىندە ءاربىر ايىپتالۋشىنىڭ جاساعان قىلمىسقا قاتىسى انىقتالدى. جيناقتالعان دالەلدەمەلەر وقيعانىڭ تولىق بەينەسىن قالپىنا كەلتىرۋگە جانە ءاربىر ايىپتالۋشىنىڭ ءرولىن ايقىنداۋعا مۇمكىندىك بەردى.
سوت ۇكىمىمەن التى ايىپتالۋشىنىڭ بارلىعى 61 باس ءىرى قارا مال ۇرلاعانى ءۇشىن كىنالى دەپ تانىلدى. مال يەلەرىنە كەلتىرىلگەن جالپى زالال 28،8 ميلليون تەڭگەنى قۇرادى. سوت ولارعا ەكى جىلدان بەس جىلعا دەيىنگى مەرزىمگە باس بوستاندىعىنان ايىرۋ جازاسىن تاعايىندادى.