مانعىستاۋ وبلىسىندا پاترۋلدىك پوليسيا قىزمەتكەرلەرى جولدا كولىكتە ەسىنەن تانىپ قالعان ءجاسوسپىرىم قىزعا شۇعىل كومەك كورسەتتى. وقيعا اقتاۋ – جەتىباي تاس جولىنىڭ 40-شاقىرىمىندا بولعان، دەپ حابارلايدى infohub.kz سايتى.
پوليسەيلەر جول جيەگىندە توقتاپ تۇرعان كولىكتى بايقاپ، جۇرگىزۋشىگە نەمەسە جولاۋشىلارعا كومەك قاجەت بولۋى مۇمكىن دەپ، جاقىنداپ كەلدى. جۇرگىزۋشىمەن اڭگىمەلەسۋ كەزىندە پوليسيا كاپيتاندارى تۇرلان وراز ۇلى مەن ءبىرجان ۋسىپبايەۆ جولاۋشىلاردىڭ ءبىرى – ءجاسوسپىرىم قىزدىڭ ەسىنەن تانىپ قالعانىن انىقتادى.
جاعدايدى باعالاعان ءتارتىپ ساقشىلارى ۋاقىت جوعالتپاي، ءجاسوسپىرىم مەن ونىڭ اناسىن پاترۋلدىك كولىككە وتىرعىزىپ، اقتاۋعا قاراي جىلدام ءجۇردى. سونىمەن بىرگە ولار جەدەل جاردەم بريگاداسىنا حابارلاسىپ، دارىگەرلەردى قارسى جولعا شىعۋىن ءوتىندى.
پاترۋلدىك پوليسيا قىزمەتكەرلەرىنىڭ جەدەل ارەكەتىنىڭ ارقاسىندا قىز مەديسينا قىزمەتكەرلەرىنە ۋاقىتىندا تاپسىرىلدى. كەيىن ونى تەكسەرۋ جانە قاجەتتى كومەك كورسەتۋ ءۇشىن وبلىستىق بالالار اۋرۋحاناسىنا جەتكىزدى.
بەلگىلى بولعانداي، قىز جانە ونىڭ اتا-اناسى قازاقستانعا داعىستاننان كەلگەن.