ماڭعىستاۋ وبلىسىندا 150 توسەكتىك اۋرۋحانا، اۋىلدىق جەرلەردە ءتورت دارىگەرلىك امبۋلاتوريا جانە بالالار وڭالتۋ ورتالىعى قوسا العاندا، جاڭا مەديسينالىق مەكەمەلەر پايدالانۋعا بەرىلدى، دەپ حابارلايدى infohub.kz سايتى.
اۋرۋحانا مۇنايلى اۋدانىندا ورنالاسقان. عيماراتتىڭ اۋدانى 30 مىڭ شارشى مەتردى قۇرايدى. مەكەمە قاجەتتى جابدىقتارمەن جاراقتاندىرىلعان.
تاعى ءتورت امبۋلاتوريا «اۋىلدىق دەنساۋلىق ساقتاۋدى جاڭعىرتۋ» جوباسى اياسىندا سالىندى. ولار اپپاق (قاراقيا اۋدانى)، قوسبۇلاق (ماڭعىستاۋ اۋدانى)، تاجەن (بەينەۋ اۋدانى) جانە كەندەرلى (جاڭاوزەنگە قاراستى) اۋىلدارىندا ورنالاسقان.
امبۋلاتوريالاردا كۇندىزگى ستاسيونارلار، زەرتحانالار، فيلتر-بوكستار، دارىگەرگە دەيىنگى كومەك كابينەتتەرى، فيزيوتەراپيا، ەمدىك دەنە شىنىقتىرۋ جانە اكۋشەرلىك كابينەتتەر قاراستىرىلعان. تۇرعىندار مۇندا العاشقى مەديسينالىق كومەك الا الادى، دياگنوستيكا مەن ەمدەلۋدەن، سونداي-اق قالپىنا كەلتىرۋ پروسەدۋرالارىنان وتە الادى.
بەينەۋ اۋدانىندا ەرەكشە قاجەتتىلىكتەرى بار بالالارعا ارنالعان «قامقورلىق» وڭالتۋ ورتالىعى جۇمىسىن باستادى. ول جىلىنا 600 بالاعا دەيىن قابىلداۋعا ەسەپتەلگەن. ورتالىقتا بالانىڭ جەكە قاجەتتىلىكتەرىن ەسكەرە وتىرىپ، 14 كۇندىك كەشەندى وڭالتۋ كۋرستارى وتكىزىلەدى.
دەنساۋلىق ساقتاۋ مينيسترلىگىندە جاڭا نىساندار ايماق تۇرعىندارىنىڭ، ونىڭ ىشىندە اۋىل تۇرعىندارى مەن بالالى وتباسىلاردىڭ مەديسينالىق كومەككە قولجەتىمدىلىگىن كەڭەيتۋى ءتيىس دەپ اتاپ ءوتتى.
بۇعان دەيىن دەنساۋلىق ساقتاۋ مينيسترلىگىنىڭ ەلدەگى 32 اۋداندىق ەمحانانى قايتا جاراقتاندىرۋ جوسپارى تۋرالى حابارلانعان بولاتىن.