ماڭعىستاۋ وبلىسىندا جاڭاوزەن قالالىق كوپسالالى اۋرۋحاناسىنا دەمەۋشىلىك كومەك رەتىندە بولىنگەن قاراجاتتىڭ جىمقىرىلۋى تەرگەلۋدە. بۇل تۋرالى infohub.kz سايتى حابارلايدى.
قارجىلىق مونيتورينگ اگەنتتىگىنىڭ ماڭعىستاۋ وبلىسى بويىنشا دەپارتامەنتىنىڭ رەسمي Telegram-ارناسىندا ءمالىم ەتىلگەندەي، 2025 جىلى ماڭعىستاۋ وبلىستىق دەنساۋلىق ساقتاۋ باسقارماسى «قازمۇنايگاز» ۇك» اق-نا كۇيىك بولىمشەسىن اشۋعا دەمەۋشىلىك كومەك كورسەتۋ تۋرالى ءوتىنىش بىلدىرگەن. جوبانى جۇزەگە اسىرۋعا 223 ملن تەڭگە ءبولىنىپ، ونى «وزەنمۇنايگاز» اق «جارىلقاۋ» قوعامدىق قورىنا اۋدارعان.
باستاپقىدا جوبا سەگىز ءتۇرلى مەديسينالىق جابدىقتى ساتىپ الۋدى جانە مامانداردى وقىتۋدى كوزدەگەن. الايدا كەيىن ونىڭ شارتتارى وزگەرتىلىپ، بولىمشەدى كەشەندى جابدىقتاۋدىڭ ورنىنا قوعامدىق قور، قالالىق اۋرۋحانا جانە «AKBS Invest» ج ش س اراسىندا قۇنى 210 ملن تەڭگە تۇراتىن ەكى عانا كۇيىككە قارسى توسەك ساتىپ الۋعا ءۇشجاقتى شارت جاسالعان.
سونىمەن قاتار، قما-نىڭ مالىمەتىنشە، ساتىپ الۋ وسىنداي قۇنداعى مەديسينالىق تەحنيكانى ءبىرىڭعاي ديستريبيۋتور ارقىلى الۋدى تالاپ ەتەتىن زاڭناما تالاپتارىن اينالىپ ءوتىپ جۇرگىزىلگەن.
«تەرگەۋ دەرەكتەرى بويىنشا، قۇقىققا قايشى سحەماعا قالالىق اۋرۋحانا ديرەكتورىنىڭ ورىنباسارى، «جارىلقاۋ» قوعامدىق قورىنىڭ جەتەكشىسى، جاڭاوزەن اكىمىنىڭ بۇرىنعى ورىنباسارى جانە جەتكىزۋشى قاتىسقان. جابدىق ساتىپ الۋعا 92 ملن تەڭگە عانا جۇمسالعان. قالعان سوما تەرگەۋ نۇسقاسى بويىنشا اففيلييرلەنگەن كاسىپورىندار ارقىلى قولما-قول اقشاعا اينالدىرىلىپ، سحەماعا قاتىسۋشىلار اراسىندا بولىنگەن»، — دەدى ۆەدومستۆودا.
قما دەرەگىنشە، «AKBS Invest» ج ش س وكىلى قىلمىستىق جولمەن تاپقان كىرىسىنە استانادان پاتەر ساتىپ الىپ، ونى ءۇشىنشى تۇلعالارعا راسىمدەگەن.
جاڭاوزەن اكىمىنىڭ بۇرىنعى ورىنباسارىنا قاتىستى قازاقستان رەسپۋبليكاسى قىلمىستىق كودەكسىنىڭ 361-بابى بويىنشا لاۋازىمدىق وكىلەتتىگىن اسىرا پايدالانۋ فاكتىسى بويىنشا تەرگەۋ باستالدى.
ءۇش كۇدىكتى قاماۋعا الىندى. سوتتىڭ سانكسياسىمەن ولاردىڭ مۇلكىنە، ونىڭ ىشىندە 3 پاتەر، 2 تۇرعىن ءۇي جانە ءبىر اۆتوكولىككە تىيىم سالىندى. تەرگەۋ جالعاسۋدا.