قازاقستان دەنساۋلىق ساقتاۋ مينيسترلىگى مەديسينا قىزمەتكەرلەرىنىڭ ءومىرى مەن دەنساۋلىعىن ساقتاندىرۋ تەتىكتەرىن جەتىلدىرۋدى ۇسىندى، دەپ حابارلايدى infohub.kz سايتى.
بۇيرىق جوباسى «اشىق نقا» پورتالىندا جاريالاندى. قۇجاتتا وزگەرىستەردىڭ نەگىزگى ماقساتتارى — مەديسينا قىزمەتكەرلەرىنىڭ جاۋاپكەرشىلىگىن ساقتاندىرۋ تەتىكتەرىن جەتىلدىرۋ، سونداي-اق ولاردىڭ كاسىبي مىندەتتەرىن ورىنداۋ كەزىندە ءومىرى مەن دەنساۋلىعىن ساقتاندىرۋ ەكەنى اتاپ وتىلگەن.
«بۇيرىق جوباسىندا مەديسينا قىزمەتكەرلەرىنىڭ كاسىبي مىندەتتەرىن ورىنداۋ كەزىندە ولاردىڭ ءومىرى مەن دەنساۋلىعىن بىرلەسىپ ساقتاندىرۋدىڭ ۇلگىلىك شارتىن ەنگىزۋ، سونداي-اق ينتەرن-دارىگەرلەر مەن رەزيدەنت-دارىگەرلەردى وقۋ كەزەڭىندە كاسىبي جاۋاپكەرشىلىك بولىگىندە ساقتاندىرۋ قورعانىسىن كەڭەيتۋ كوزدەلەدى»، — دەلىنگەن جوبادا.
سونىمەن قاتار، مەديسينا قىزمەتكەرىنىڭ كاسىبي مىندەتتەرىن ورىنداۋ كەزىندە ءۇشىنشى تۇلعالاردىڭ زورلىق-زومبىلىق ارەكەتتەرى سالدارىنان ونىڭ ءومىرى مەن دەنساۋلىعىنا زيان كەلتىرىلگەن جاعدايلاردا ساقتاندىرۋ تولەمدەرىن جۇزەگە اسىرۋ جاعدايلارىن ايقىنداۋ ۇسىنىلادى.
سونداي-اق جوبادا ساقتاندىرۋ تولەمدەرىن جۇزەگە اسىرۋ ءتارتىبىن جانە دەنساۋلىق ساقتاۋ سۋبەكتىلەرى، مەديسينا قىزمەتكەرلەرى، پاسيەنتتەر مەن ءبىرىڭعاي ساقتاندىرۋ (قايتا ساقتاندىرۋ) پۋلىنىڭ اكىمشىسى اراسىنداعى ءوزارا ءىس-قيمىلدى جەتىلدىرۋ كوزدەلگەن. دسم پىكىرىنشە، جاڭا ەرەجەلەر مەديسينا قىزمەتكەرلەرىنىڭ الەۋمەتتىك جانە قۇقىقتىق قورعالۋىن ارتتىرۋعا، ولاردىڭ كاسىبي جاۋاپكەرشىلىگىن ساقتاندىرۋدى جاقسارتۋعا، سونداي-اق مەديسينالىق قىزمەت ناتيجەسىندە پاسيەنتتەردىڭ ومىرىنە نەمەسە دەنساۋلىعىنا زيان كەلتىرىلگەن جاعدايدا ولارعا ساقتاندىرۋ تولەمدەرىن قامتاماسىز ەتۋگە ءتيىس.
جوبا 16 قىركۇيەككە دەيىن قوعامدىق تالقىلاۋدا. ەسكە سالايىق، 7 ناۋرىزدا قازاقستاندا مەديسينا قىزمەتكەرلەرىنە قاتىستى فيزيكالىق زورلىق-زومبىلىق پەن قورقىتۋ ءۇشىن جازانى قاتاڭداتۋ بويىنشا قىلمىستىق كودەكسكە وزگەرىستەر كۇشىنە ەندى.