22 تامىزدا الماتىداعى Mega Alma-Ata ساۋدا-ويىن-ساۋىق ورتالىعىندا ءورت دابىلى قاعىلىپ، كەلۋشىلەر ەۆاكۋاسيالاندى. وقيعا ورنىنا ءورت ءسوندىرۋ بريگادالارى كەلدى، دەپ حابارلايدى infohub.kz.
ەۆاكۋاسيا پروسەسى تۇسىرىلگەن بەينەجازبالار الەۋمەتتىك جەلىلەردە تەز تارادى.
قالالىق توتەنشە جاعدايلار دەپارتامەنتىندە شاقىرتۋدىڭ جوعارى دارەجەسى راستالماعانىن، اشىق جانۋ انىقتالماعانىن حابارلادى.
«اشىق جانۋ انىقتالعان جوق. ال اۆتوماتتى ءورت دابىلىنىڭ نەگە قاعىلعانىن ماماندار انىقتايتىن بولادى»، — دەپ ءتۇسىندىردى تجد ءباسپاسوز قىزمەتى.
Mega Alma-Ata-نىڭ رەسمي Instagram-پاراقشاسىندا ادامداردىڭ ءومىرى مەن دەنساۋلىعىنا ءقاۋىپ جوق ەكەنى، ال ساۋدا ورتالىعىنىڭ ءوزى ادەتتەگى رەجيمدە جۇمىسىن جالعاستىرىپ جاتقانى حابارلاندى.
«قۇرمەتتى كەلۋشىلەر! Mega Alma-Ata-دا ءورت دابىلى قاعىلدى. جاعداي باقىلاۋدا، بارلىق جۇيە قالىپتى رەجيمدە جۇمىس ىستەپ تۇر. ساۋدا ورتالىعى جۇمىسىن جالعاستىرۋدا. كەلۋشىلەردىڭ ءومىرى مەن دەنساۋلىعىنا ءقاۋىپ جوق. ءقازىر ءبىز تەكسەرۋ جۇرگىزىپ، وقيعانىڭ ءمان-جايىن انىقتاپ جاتىرمىز. تۇسىنىستىك تانىتقاندارىڭىزعا راحمەت»، — دەلىنگەن ساۋدا ورتالىعىنىڭ حابارلاماسىندا.
دابىلدىڭ قاعىلۋ سەبەپتەرى انىقتالىپ جاتىر.
بۇعان دەيىن «كۋرسيۆ» Mega Alma-Ata-دا ەسكالاتوردا ورمەكشى-ادام كوستيۋمىن كيگەن ون شاقتى ادامنىڭ بەينەجازباسى پايدا بولعانىن حابارلاعان ەدى. ءبىر تاۋلىك ىشىندە بەينەروليك 54 مىڭنان استام قارالىم جينادى.