قازاقستاندا 544 مىڭنان استام مۇگەدەكتىگى بار ادام مەملەكەتتىك الەۋمەتتىك جاردەماقى الادى. 2026 جىلى نەگىزگى تولەم مولشەرى مۇگەدەكتىك توبىنا بايلانىستى ايىنا 61 مىڭنان 112 مىڭ تەڭگەگە دەيىن جەتەدى، دەپ حابارلايدى infohub.kz سايتى.
جالپى اۋرۋ سالدارىنان مۇگەدەكتىك بەلگىلەنگەن جاعدايدا I توپتاعى ادامدارعا ايىنا 111 873 تەڭگە تولەنەدى. II توپ ءۇشىن جاردەماقى 89 498 تەڭگەنى، III توپ ءۇشىن — 61 022 تەڭگەنى قۇرايدى.
سونىمەن قاتار، مەملەكەتتىك جاردەماقى جالعىز تولەم بولماۋى مۇمكىن. ەڭبەك جانە حالىقتى الەۋمەتتىك قورعاۋ مينيسترلىگىنىڭ تۇسىندىرۋىنشە، ەگەر ادام ءۇشىن بۇرىن مەملەكەتتىك الەۋمەتتىك ساقتاندىرۋ قورىنا الەۋمەتتىك اۋدارىمدار جاسالعان بولسا، ول ەڭبەككە قابىلەتتىلىگىنەن ايىرىلۋىنا بايلانىستى قوسىمشا تولەم الا الادى. مۇندا ءبىرىڭعاي سوما جوق: ول بۇرىنعى تابىسقا، ەڭبەككە قابىلەتتىلىگىنەن ايىرىلۋ دارەجەسىنە جانە ادامنىڭ مىندەتتى الەۋمەتتىك ساقتاندىرۋ جۇيەسىنە قاتىسۋ ۇزاقتىعىنا قاراي ەسەپتەلەدى.
ەگەر مۇگەدەكتىك وندىرىستىك جاراقات نەمەسە كاسىبي اۋرۋ سالدارىنان بولسا، جەكە ءتارتىپ قولدانىلادى. مۇنداي جاعدايلاردا قىزمەتكەرگە ساقتاندىرۋ تولەمدەرى تاعايىندالۋى مۇمكىن.
سونداي-اق I توپتاعى مۇگەدەكتىگى بار ادامعا كۇتىم جاسايتىندارعا دا اقشا قاراستىرىلعان. 2026 جىلى اي سايىنعى جاردەماقى 81 871 تەڭگەنى قۇرايدى. مۇگەدەكتىگى بار بالانى تاربيەلەپ وتىرعان اناعا، اكەگە، اسىراپ الۋشىعا، قورعانشىعا نەمەسە قامقورشىعا دا ءدال وسىنداي سوما تولەنەدى.
جاردەماقىنى «ازاماتتارعا ارنالعان ۇكىمەت» نەمەسە eGov ارقىلى راسىمدەۋگە بولادى. سونداي-اق پرواكتيۆتى نۇسقا دا بار: مۇگەدەكتىك بەلگىلەنگەننەن كەيىن ادامعا تولەمدى راسىمدەۋ تۋرالى ۇسىنىسپەن SMS كەلەدى. قاجەتتى مالىمەتتەر مەملەكەتتىك بازالاردا بار بولسا، جەكە ءوتىنىشسىز-اق كەرى حابارلاما ارقىلى كەلىسىمىن راستاۋ جەتكىلىكتى.
بۇعان دەيىن 2027 جىلى اەك-تى 8،5%-عا — 4 693 تەڭگەگە دەيىن ارتتىرۋ جوسپارلانىپ وتىرعانى، الايدا بۇل ءبىرقاتار الەۋمەتتىك تولەمدەردىڭ وسۋىنە اكەلمەيتىنى حابارلانعان بولاتىن. بالالى وتباسىلارعا، كوپبالالى انالارعا جانە باسقا دا كەيبىر تولەمدەرگە ارنالعان جاردەماقىلاردى 2026 جىلعى اەك بويىنشا ەسەپتەۋدى ساقتاۋ جوسپارلانۋدا. مۇگەدەكتىك بويىنشا جاردەماقىلار دا بۇرىنعى كۇنكورىس مينيمۋمى نەگىزىندە ەسەپتەلۋى مۇمكىن.