الماتىداعى ناۋرىزباي اۋداندىق سوتى «نۇر-مۇقاسان» توبىنىڭ مۇشەسى ازامات ەسەركەنوۆكە قاتىستى ۇكىم شىعاردى. ول مۇقاسان شاحزاداەۆتىڭ ۇيىندە ءانشى عالىمجان سۇلەيمەندى ۇرىپ-سوققان. بۇل تۋرالى infohub.kz حابارلايدى.
14 شىلدەدە اشىق سوت وتىرىسى ءوتتى. وعان حاتشى ج. داۋلەتقۇل، مەملەكەتتىك ايىپتاۋشى پروكۋرور ب. ءجۇنىس، جابىرلەنۋشىنىڭ ادۆوكاتى ا. جانىسوۆ جانە سوتتالۋشىنىڭ قورعاۋشىسى س. ۋسۋپجانوۆ قاتىستى. وتىرىس بارىسىندا ءىس ماتەريالدارى تولىق قارالدى.
ءىس ماتەريالدارىنا سايكەس، وقيعا 2025 جىلعى 20 قاراشادا تۇسكە تامان الماتى قالاسىنىڭ قالقامان-2 شاعىن اۋدانىنداعى ساۋرىق باتىر كوشەسىندە ورنالاسقان مۇقاسان شاحزاداەۆتىڭ ۇيىندە بولعان. سول كۇنى ءۇي يەسى مەن جابىرلەنۋشى عالىمجان سۇلەيمەن اراق-شاراپ ىشكەن. ساعات 13:00 شاماسىندا ولارعا ءانشىنىڭ اكىمشىسى ازامات ەسەركەنوۆ جانە تاعى ءبىر تانىسى ب. قويسويماسوۆ قوسىلعان.
ماستىقتان عالىمجان سۇلەيمەن قاتىسۋشىلاردى بوقتاپ، ولاردىڭ نامىسىنا تيگەن. سودان كەيىن ءۇي يەسى وعان كەتۋدى ۇسىنعان. ازامات ەسەركەنوۆ جابىرلەنۋشىنى اۋلادان يتەرىپ شىعارعان، ءبىراق ول قاقپانى ۇرىپ، ايقايلاپ، بالاعاتتاي بەرگەن. جابىرلەنۋشى قاقپانى قايتا اشقان كەزدە، ازامات ەسەركەنوۆ ونىڭ بەتى مەن باسىنا بىرنەشە رەت سوققى سالعان.
سوت ازامات ەسەركەنوۆتى قىلمىستىق كودەكستىڭ 108-1-بابىنىڭ 1-بولىگى بويىنشا (دەنساۋلىققا قاساقانا جەڭىل زيان كەلتىرۋ) كىنالى دەپ تاۋىپ، 20 ايلىق ەسەپتىك كورسەتكىش مولشەرىندە ايىپپۇل سالدى. ۇكىم بويىنشا، كىنالى ءبىر اي ىشىندە مەملەكەتتىك بيۋدجەتكە 86 500 تەڭگە تولەۋگە جانە جابىرلەنۋشىلەرگە وتەماقى قورىنا قوسىمشا 19 660 تەڭگە اۋدارۋعا مىندەتتى.