اتىراۋ وبلىسىندا مۇناي كومپانياسى ەكولوگيالىق زاڭنامانى بىرنەشە رەت بۇزعانى ءۇشىن اكىمشىلىك جاۋاپكەرشىلىككە تارتىلدى، دەپ حابارلايدى infohub.kz سايتى.
«اق جايىق» باسىلىمىنىڭ مالىمەتىنشە، جەرگىلىكتى «پوتەنسيال ويل» جشس-نە اتىراۋ وبلىسى بويىنشا ەكولوگيا دەپارتامەنتىنىڭ تەكسەرۋى قورىتىندىسى بويىنشا 1،4 ملرد تەڭگەدەن استام ايىپپۇل سالىنعان.
ەكوينسپەكتورلار ءبىرقاتار ەلەۋلى بۇزۋشىلىقتاردى انىقتادى: ءتيىستى وندىرىستىك ەكولوگيالىق باقىلاۋدىڭ بولماۋى، اعىندى سۋلاردى مونيتورينگىلەۋ كەزىندەگى بۇزۋشىلىقتار جانە ەسەپتىلىك ۇسىنۋداعى اقاۋلار، رۇقسات ەتىلگەن شىعارىندىلار نورماتيۆتەرىنىڭ اسىپ كەتۋى جانە ەكولوگيالىق رۇقساتتارسىز جۇمىس ىستەۋ، سونداي-اق توپىراقتىڭ مۇناي ونىمدەرىمەن لاستانۋى جانە قالدىقتارمەن جۇمىس ىستەۋ ەرەجەلەرىنىڭ ساقتالماۋى.
«سالىنعان اكىمشىلىك ايىپپۇلداردىڭ جالپى سوماسى 1 ملرد 433،8 ملن تەڭگەنى قۇرادى. قازىرگى ۋاقىتتا كاسىپورىن نەبارى 21،9 ملن تەڭگەنى تولەگەن. قالعان 1 ملرد 411،9 ملن تەڭگە كولەمىندەگى ايىپپۇلدى كومپانيا داۋلاۋعا تىرىسقان. الايدا ءبىرىنشى جانە اپەللياسيالىق ساتىداعى سوتتار ەكولوگتاردىڭ جاعىنا شىعىپ، «پوتەنسيال ويل» ءجشس-نىڭ شاعىمدارىن قاناعاتتاندىرۋسىز قالدىردى»، — دەلىنگەن ماتەريالدا.
ۆەدومستۆو كاسىپورىن زاڭدا بەلگىلەنگەن مەرزىمدە قارىزدى وتەمەسە، قاۋلىلار ماجبۇرلەپ ءوندىرىپ الۋ ءۇشىن سوت ورىنداۋشىلارىنا جىبەرىلەتىنىن ەسكەرتتى.