2026 جىلدىڭ ءبىرىنشى جارتىجىلدىعىندا قازاقستانداعى ەڭ تانىمال جول تالعامايتىن كولىكتەر اتالدى. Toyota Land Cruiser Prado سەگمەنتتە ءسوزسىز كوشباسشى بولىپ قالا بەرەدى، ال قىتايلىق ۇلگىلەر العاشقى بەستىكتە ءۇش ورىندى يەلەندى، دەپ حابارلايدى infohub.kz سايتى.
2026 جىلعى قاڭتار-ماۋسىم ارالىعىندا قازاقستاندىقتار رەسمي ديلەرلەردەن شامامەن 4 مىڭ جاڭا رامدى كولىك ساتىپ الدى. ونىڭ 841ء-ى Toyota Land Cruiser Prado ۇلەسىنە ءتيدى. مودەل باعاسى 2،7 ليترلىك نۇسقا ءۇشىن 38،2 ملن تەڭگەدەن باستالىپ، 2،4 ليترلىك تۋربوكوزعالتقىشى بار جەتى ورىندىق نۇسقادا 53 ملن تەڭگەگە جەتەدى. ساتىلىم ستاتيستيكاسىندا بىرنەشە جىل قويمادا تۇرعان 2022 جىلعى 4 ليترلىك قوزعالتقىشى بار Land Cruiser Prado J150 دە تىركەلگەن.
ەكىنشى ورىندى قىتايلىق Tank 300 يەلەندى – جارتى جىلدا 581 اۆتوكولىك ساتىلعان. باعاسى جيىنتىعىنا قاراي 20–23،3 ملن تەڭگە ارالىعىندا. ساتىپ الۋشىلار كوبىنەسە الدىڭعى كوپىرى قوسىلاتىن كلاسسيكالىق Part-Time سحەماسىن تاڭدايدى. ءۇشىنشى ورىندى كۇتپەگەن جەردەن رەسەيلىك Lada Niva Legend يەلەندى – ديلەرلەر 500 اۆتوكولىكتى 7،8–8،3 ملن تەڭگە باعاسىمەن ساتقان. الايدا رەسەيلىك اۆتوكولىكتەردى اكەلۋگە ۋتيلالىمنىڭ كۇرت وسۋىنە بايلانىستى Lada-عا سۇرانىس تومەندەۋى مۇمكىن. قازىرگى شارتتار ساقتالسا، قويماداعى قورلار بىرتە-بىرتە تاۋسىلادى.
ءتورتىنشى تانىمال – Haval H5: التى ايدا 404 ماشينا ساتىلعان. قازاقستاندا جول تالعامايتىن كولىكتىڭ باعاسى ارنايى ۇسىنىستاردى ەسەپكە الماعاندا 16،8–18،2 ملن تەڭگە. بەسىنشى ورىندا – Tank 500: ديلەرلەر 320 اۆتوكولىك وتكىزگەن. مودەل 3 ليترلىك قوزعالتقىشپەن ءتورت جيىنتىقتا 27،8–33 ملن تەڭگە باعاسىندا قولجەتىمدى.
التىنشى ورىندا – 198 اۆتوكولىكپەن Haval H9. ودان كەيىن Chevrolet Tahoe (177)، Toyota Land Cruiser (162) جانە Lada Niva Travel (143). Lexus LX ساتىلىمى ايتارلىقتاي قۇلدىراعان: 2025 جىلدىڭ ءبىرىنشى جارتىسىندا ديلەرلەر 461 اۆتوكولىك ساتسا، 2026 جىلدىڭ وسى كەزەڭىندە نەبارى 137. 70،3% -عا تومەندەۋ مودەلدى ءۇشىنشى ورىننان ونىنشى ورىنعا ىسىردى. ونىنشى ورىندا – Lexus LX (137)، ون ءبىرىنشى – Lexus GX (101)، ون ەكىنشى – ROX 019 (95)، ون ءۇشىنشى – Infiniti QX80 (86)، ون ءتورتىنشى – Cadillac Escalade (69)، ون بەسىنشى – Range Rover (63).
وسىلايشا، ءبىرىنشى جارتىجىلدىقتا قىتايلىق رامدى كولىكتەر ەڭ تانىمال جول تالعامايتىن كولىكتەردىڭ توپ-بەستىگىندە ءۇش ورىن الدى، الايدا Toyota Land Cruiser Prado سەگمەنتتىڭ ءسوزسىز كوشباسشىسى بولىپ قالا بەرەدى.
بۇعان دەيىن كۋرسيۆ اۆتو Chevroletء-دىڭ قازاقستاننىڭ اۆتورىنوگىندا كوشباسشىلىققا قايتا ورالعانىن، ال Changan العاش رەت ەڭ تانىمال برەندتەردىڭ ۇشتىگىنە ەنگەنىن حابارلاعان. سونداي-اق BYD مەن Geely Galaxy ەلىمىزدىڭ ەلەكتروموبيل جانە گيبريد نارىعىن باسقارىپ وتىرعانى ايتىلدى.