قازاقستاندا «نەكە تىركەۋ مەرزىمىن ۇزارتۋ» قاجەتتىگى تۋرالى الاياقتىق اقپارات تارالۋدا، دەپ حابارلايدى infohub.kz سايتى.
ادىلەت مينيسترلىگىنىڭ رەسمي وكىلى تالعات ءۋالي نەكە-وتباسى زاڭناماسىنا سايكەس، نەكە ءبىر رەت تىركەلەتىنىن جانە ونىڭ قولدانىلۋ مەرزىمى بەلگىلەنبەگەنىن ءتۇسىندىردى. سوندىقتان ونى ۇزارتۋ تالاپ ەتىلمەيدى.
نەكە تەك ەرلى-زايىپتىلاردىڭ بىرەۋىنىڭ نەمەسە ەكەۋىنىڭ ارىزى بويىنشا اجىراسۋ ارقىلى نەمەسە زاڭدا كوزدەلگەن وزگە جاعدايلاردا عانا توقتاتىلۋى مۇمكىن.
اجىراسۋ تىركەۋشى ورگان ارقىلى نەمەسە سوت تارتىبىمەن جۇزەگە اسىرىلادى. ءبىرىنشى جاعدايدا نەكە اجىراسۋدى مەملەكەتتىك تىركەۋ كۇنىنەن باستاپ، ەكىنشىسىندە سوت شەشىمى زاڭدى كۇشىنە ەنگەن كۇننەن باستاپ توقتاتىلادى.
ادىلەت مينيسترلىگى مۇنداي حابارلامالارعا سەنبەۋگە، ولارداعى سىلتەمەلەرگە وتپەۋگە جانە جەكە دەرەكتەردى ءۇشىنشى تۇلعالارعا بەرمەۋگە شاقىردى.
ازاماتتارعا شىنايى اقپارات الۋ ءۇشىن تەك رەسمي كوزدەردى پايدالانۋ ۇسىنىلادى.
بۇعان دەيىن «كۋرسيۆ» الاياقتاردىڭ قازاقستاندىقتاردىڭ اقشاسى مەن جەكە دەرەكتەرىن ۇرلاۋ ءۇشىن جاساندى ينتەللەكت پەن باسقا دا تەحنولوگيالاردى ءجيى قولداناتىنىن جازعان بولاتىن. كەڭ تارالعان سحەمالاردىڭ قاتارىندا بانك پەن قۇقىق قورعاۋ ورگاندارىنىڭ جالعان قىزمەتكەرلەرىنەن قوڭىراۋ شالۋ، كرەديتتەردىڭ بەكىتىلگەنى تۋرالى حابارلامالار، فيشينگتىك سىلتەمەلەر جانە تۋىستاردىڭ داۋىسىن الماستىرۋ بار.
استانا پروكۋراتۋراسى بوگدە ادامدارعا SMS-كودتاردى، پارولدەردى، CVV/CVC-كودتاردى جانە بانك كارتالارىنىڭ دەرەكتەرىن حابارلاۋعا، بەيتانىس ادامداردىڭ نۇسقاۋى بويىنشا قاشىقتان قول جەتكىزۋگە ارنالعان قوسىمشالاردى ورناتۋعا جانە اقشانى «ءقاۋىپسىز شوتتارعا» اۋدارۋعا بولمايتىنىن ەسكەرتكەن.