نۇراي سەرىكبايدىڭ ادۆوكاتى ايانحان وماروۆ ماڭىزدى مالىمدەمە جاسادى، دەپ حابارلايدى infohub.kz.
ونىڭ سوزىنشە، الەۋمەتتىك جەلىدە مارقۇم نۇراي سەرىكبايدى قورلايتىندار بار. سونداي ادامداردىڭ ءبىرى قىزدىڭ اتىنا ورىنسىز سوزدەر جازعان.
«Instagram-داعى نۇراي سەرىكبايدىڭ ىسىنە قاتىستى قورلايتىن پىكىر قالدىرعان اككاۋنت يەسىن انىقتاۋ جانە زاڭ اياسىندا جاۋاپقا تارتۋ تۋرالى ق ر ءىىم كيبەرقىلمىسقا قارسى ءىس-قيمىل دەپارتامەنتىنە رەسمي ارىز جولداندى. الەۋمەتتىك جەلىدەگى انونيمدىلىك جاۋاپكەرشىلىكتەن بوساتپايدى»، - دەپ جازدى ادۆوكات.
بۇعان دەيىن نۇراي سەرىكبايدىڭ تۋىستارى تەرگەۋ جۇمىسىنا كوڭىل تولمايتىنىن بىلدىرگەن. ءىس ماتەريالدارىمەن تانىسقاننان كەيىن ولار مەن ادۆوكاتتارى ەلەۋلى زاڭبۇزۋشىلىقتار انىقتالعانىن ايتىپ، ماتەريالداردى قوسىمشا تەرگەۋگە قايتارۋدى سۇراعان.
مارقۇمنىڭ جاقىندارى ءىس سوتقا جولدانعان كەزدە ايىپتىڭ كەيبىر باپتارى الىنىپ تاستالۋى مۇمكىن دەپ الاڭداپ وتىر.
قازىرگى ۋاقىتتا 28 جاستاعى كۇدىكتىگە اسا قاتىگەزدىكپەن ادام ءولتىرۋ، ستالكينگ جانە نەكەگە تۇرۋعا ماجبۇرلەۋ باپتارى بويىنشا ايىپ تاعىلعان.
ەسكە سالايىق، 21 جاستاعى نۇراي سەرىكباي 11 قاڭتار كۇنى كەشكە شىمكەنتتە قازا تاپقان. تەرگەۋ نۇسقاسىنا قاراعاندا، كۇدىكتى قىزدى دۇكەننىڭ جانىندا اڭدىپ كۇتىپ، كۇشپەن ۇستاپ تۇرعان، وعان بىرنەشە رەت پىشاق سۇعىپ، كەيىن وقيعا ورنىنان بوي تاسالاعان.